《使徒行者》劇情結局6大必睇位！劇透「宋先生」真身、續集竟然係《使徒行者3》
撰文、圖片：東方新地
相關文章：《使徒行者3 》1-37集劇情、線上看大結局劇透！
《使徒行者》劇情劇透必睇位 1：阿佘爆seed演繹奪「 十一料視后 」
故事講述性格樂天嘅佘詩曼係警方臥底，任務要尋找五名下落不明嘅臥底，展開一場遊走黑白兩道嘅生存遊戲。阿佘為查案潛入桑拿店幫客人揼骨、按摩，一時又要扮護士同清潔阿姐。為咗喺目標人物蠱惑仔林峯身上套料，更放電色誘對方，笑料百出！而另一方面佢又以聰明才智去完成任務，見佢著上皮褸騎電單車盡顯型女一面。
劇情往後發展，可以留意「釘姐」以下幾集精彩演出 ：
第19集劇情：有一場戲講述阿佘發現警方臥底「 Ada 」（陳倩揚 飾）嘅屍體後，安葬時佢嘅情緒起伏，爆晒seed，真係隔住個 mon 都覺得空虛寂寞覺得凍，「 十一料視后 」並唔係浪得虛名！
第22集劇情：為了臥底任務，假扮覃歡喜的親生女兒，連觀眾都呃埋！
第25集劇情：因爆Seed薛家強間接害死其養母和射殺覃歡喜，決絕和他分手
相關文章：《使徒行者3》情節緊接第一輯！馬國明林峯亦敵亦友、釘姐佘詩曼客串再現身！
《使徒行者》劇情劇透必睇位 2：結局緊湊Final Boss「宋先生」黑警犯罪集團
《使徒行者》劇情雖然以尋找失落臥底為主，但亦成功拓展了以競猜誰是「黑警」的故事類型，頭十五集以「洪英社」為主線，但發展到後期，真正的終極反派原來訧係警方甚至政府高層內部！當年大家都將焦點放喺臥底情節上，當刑事情報科嘅總警司劉江同警司鄧健泓嘅黑警身份曝光，可以話係劇集高潮位之一。另「卓Sir 」苗僑偉調轉槍頭向自己友開槍，以苦肉計扮變節劇情，過程緊張刺激。
第25集劇情：高海寧飾演的Amy指使爆Seed薛家強殺害覃歡喜，及指使下屬殺害釘姐的養母馮慧芳、劉美鶯、蔡笑蓮，同時被殺還有猜Fing！
第29集劇情：高海寧於第28集被莫羨昕和丁小嘉發現原來是變節的臥底，眾人以為佢就係「宋先生」，但在同一集竟然被鍾景輝買兇殺害！
《使徒行者》結局劇情必睇位 3：林峯為愛捨身試毒
阿佘嘅角色「 釘姐 」，猶如「 女版韋小寶 」，化解危機依靠三寸不爛之舌！而林峯罕有以反派形象登場，表面上係運送冰嘅工人，外號「爆seed 」，實質又係警方臥底，將內心嘅掙扎同矛盾演繹得淋漓盡致。「 爆 seed 」同「釘姐」起初未知對方底蘊，經常打情罵俏，呢對歡喜冤家喺鬥智鬥勇下，漸漸擦出愛火花，經典一幕係男方為保護女方，不惜以身試毒，點知劑量過強陷瀕死邊緣一幕，叫人難忘。
《使徒行者》結局劇情必睇位 4：親母養母輪住死
點解阿佘係「 不祥人 」？親母離世，「 釘姐 」開設好腳頭沐足店，作為收風站。佢三位養母呂珊、韓馬利、蘇恩磁不幸被捲入呢場黑白兩道之戰，喺同一集先後被黑幫人物逐一槍殺慘死。呢套劇亦係 TVB 近年死得最多人嘅劇集，自刑事情報科「 康 Sir 」（歐瑞偉飾）被買兇殺害後，其情人「 Ada 」（陳倩揚 飾）亦遇害，之後到黑幫洪英社坐館歡喜哥（許紹雄 飾）嘅心腹連浩勤（沈震軒 飾），被診斷出腦部有惡性腫瘤，接受安樂死而離世。
《使徒行者》結局劇情必睇位 5：五臥底之後仲有黑警
五名警方臥底，逐一揭盅 ︰分別係「 釘姐 」、「 爆 seed 」，「 Ada 」、「 連浩勤 」，當年網上掀起競猜誰是最後一位臥底，爆出個冷門，竟然係「 Amy 」（高海寧 飾），但佢已變節投身犯罪集團。往後劇情，有廉政公署執行處調查主任Yan（陳敏之 飾）亦加入刑事情報科「卓Sir 」（苗僑偉 飾）嘅臥底兵團，成為第六個臥底。
《使徒行者》結局劇情必睇位 6：沈震軒放催淚彈
許紹雄飾演嘅黑幫大佬覃歡喜出獄，招攬咗「爆seed 」、財技高手連浩勤（沈震軒 飾）作為左右手，圖謀東山再起。歡喜哥亦係刑事情報科出身，佢為咗報妻女之仇而選擇踏上黑道呢條不歸 路。至於沈震軒嘅角色，囂張成性，但對女朋友即廉政公署執行處調查主任Yan（陳敏之 飾）用情至深，患上惡性腦瘤後，為咗唔想令女友擔心傷心，決定不辭而別，最催淚係佢叫護士定時向Yan發放早已錄製好自己生活片段嘅影片，而最終Yan亦搵到佢嘅墳墓，喊死人咩！
