大肚關心妍 嚴防流感

現年36歲嘅關心妍(Jade)同老公楊長智(Jonas)婚後經過7年努力終於造人成功，如今懷孕五個多月，Jade梗係勁緊張腹中塊肉啦！日前佢到商台接受訪問，就同八姨太講話近排流感太勁，出親街佢都會帶定消毒紙巾同空氣清新機，慎防中招會影響BB。佢又話陀B初期經常作嘔，好在冇出現害喜，胃口大增，唔止身材發福，連上圍都升cup！講到近日有報道指佢預早請咗楊千嬅個陪月姨姨幫手，Jade就澄請係請咗陪月，但唔係楊千嬅嗰個。再問BB性別，佢就話要到月底先可以揭盅，問到會唔會同老公一齊影番輯大肚寫真？Jade就話：「要睇老公肯唔肯，因為佢唔習慣影相，好容易面紅！」佢又透露自己有意再追多個：「頂多生兩個，肯嚟就最好啦！如果冇，一個都好開心！」