夏雨 慳家最強

七十幾歲嘅夏雨，依然好貪靚，呢排天氣凍，但佢就唔鍾意着羽絨出街，反而鍾意西裝骨骨，嗰日佢出九龍城置裝，紳士帽襯西裝褸，再戴埋條白頸巾，好鬼講究。
見佢由街頭行到落街尾，專攻減價貨，睇怕都係想買衫過年。行足個幾鐘，左度右度後，最後佢折返一間低至三折嘅舖頭買西裝，試完又試。但因為佢身形短度闊封，要改短袖口同褲，所以就先俾錢後攞貨。
嗱！格價呢樣嘢唔係師奶專利，好似夏雨咁，行勻成條街至扑槌買，一於做個精明消費者。