港姐謝嘉怡媽媽美貌曝光 秘照母女如姊妹

撰文：東方新地

2020港姐冠軍謝嘉怡念媽美貌曝光

昨為謝嘉怡Lisa母親生日，她上載了三張相，分別為母女合照、媽咪與狗合照及童年同父母在影樓拍的家庭照，相中謝嘉怡Lisa樣貌標緻、清秀可人，謝嘉怡媽媽打扮時髦當然亦是靚女一名，眼大鼻高，輪廓甚深，看來Lisa的美貌遺傳自美媽媽多過凍齡爸爸。

原來她越洋為母慶生，並稱今年是首次與母分隔兩地，未能親身陪在媽媽身邊過生日，她以英文寫道：

「媽媽生日快樂！感謝你多年來一直在我身邊，支持我去冒險！好榮幸你能夠成為我的導師、我的榜樣以及我最好的朋友。今年你生日，我們第一年分開度過，但我保證，將來會好好同你補祝。」

字裡行間盡見母女情深，思念至極。

肥媽指謝父Peter唔似54歲

25歲的《香港小姐2020》冠軍謝嘉怡返完大埔認祖歸宗，之後便去提名她參選的肥媽主持的直播節目做嘉賓，更孖埋父親上節目，節目中親揭同肥媽的關係，原來肥媽兒子是謝父Peter的好友，肥媽重提當年時一度眼濕濕：「多謝Peter，嗰時我個仔係英國發生意外，多謝你日日煮嘢畀佢食照顧佢，嗰年係1994年，嗰時我個仔十幾歲，依家都四十幾﹗」道出兩家的淵源，肥媽又在節目中透露謝父Peter本身是廚師，笑稱呢集應該由謝父教煮餸，又問外貌年輕的謝父究竟今年貴庚？謝父Peter答：「我今年54歲，（點解咁後生，啲人話你係 Lisa個拖友？）生活簡單啲。」

肥媽賜謝嘉怡「排骨妹」封號

肥媽在節目為最愛食排骨的謝嘉怡煮糖醋排骨，之後坐低邊食邊傾，肥媽爆Lisa剛才在canteen指定食排骨飯，然後笑稱契仔6號（陸浩明）叫「鹹濕仔」，8號謝嘉怡叫「排骨妹」相當巧合，更明言跟Lisa有眼緣又投契，有意上契，跟契仔三人合作，被網民笑指母女合作，肥媽即打蛇隨棍上：「各大廣告商可以考慮我哋呀真係，係佢貴啲啫，我好cheap㗎咋，柴、米、油、鹽、醬、醋　茶、電器、凍肉、化妝品、護膚品、香水，乜都得㗎，呀，仲有《食平D》監製下一輯可以加埋Lisa一齊三個主持吖。」相當進取﹗

肥媽教睇無綫節目學演技及廣東話

25歲的謝嘉怡在蘇格蘭是手術室護士，奪得《香港小姐2020 》後明言想入行拍劇，當前急務時練好廣東話，而肥媽立即傳授秘笈：「我哋無綫有好多節目，你由朝開始睇睇到夜晚，乜類型節目都睇，劇集呀、綜藝節目呀，睇得多自然識做，演技同廣東話就係咁練番嚟﹗」Lisa受教認同：「喺蘇格蘭就算同屋企人都講英文，返嚟呢段時間多咗講，就有啲進步﹗」