黎耀祥同老婆恩愛廿幾年：我哋價值觀幾一致！

撰文：東方新地｜圖片：新傳媒圖片庫、黎耀祥IG

黎耀祥談夫妻相處之道：大原則要好相同

問黎耀祥結咗婚幾耐？夫妻相處之道係點？佢話：「二十幾年㗎嘞。我哋相處係OK嘅、舒服嘅。學習啦，我成日覺得做人都係不斷嘅學習，做老公、老婆、仔女都好，因為無經驗，大家都係嚟到呢一世先識嘅啫，上一世點做我又唔記得咗，所以教仔嘅方法、同老婆相處嘅方法，其實每日都學緊。係咪好恩愛？其實我哋都有衝突㗎，一樣嗌交、一樣有唔開心嘅時候，我同我太太好明白，兩夫婦點樣走埋人生嘅路，最緊要大原則要好相同，譬如對錢銀、人生嘅步伐要同步或者近似，好彩我哋喺價值觀上都幾一致，又唔係太過緊張、又唔係太過hea，兩個都係積極做好自己嘅嘢，知足、努力，變咗兩個人行一條路，比較容易行。其實大家都知婚姻去到尾真係一個伴，個伴要啱，先至係一個伴，如果唔係盞搞，搵個人嚟喺身邊嗌交，咁不如自己一個好過啦！哈哈哈！」

有break就返屋企食飯

講到黎耀祥夫妻將親子關係做得好好，同囝囝都好close，黎耀祥直言：「OK㗎，其實我好著重，因為我成日覺得，好多人成日話為家庭做好多嘢，但到最尾忘記咗家庭，我分好多時間畀屋企，好彩我個人冇乜應酬，我唔係好鍾意應酬，又冇乜朋友，以前我收工就返屋企，有個break就返屋企食個飯，變咗我同個仔相處嘅時間好多，到佢大個，就會同我哋close好多。」

自細培養囝囝思考

提到傳媒將囝囝post跑車相上網做話題，黎耀祥表示：「咁我哋做得呢行，食得鹹魚抵得渴，我哋嘅某啲生活，大家都有興趣嘅，佢放嗰啲跑車都係我嘅，唔通佢買咩？我亦都唔會買畀佢，咁佢揸我車，我又唔會抗拒，因為一家人嘛。我又唔覺得因為我嘅知名度要限制佢好多嘢，我成日都同佢講你係我個仔就係我個仔，有好多人對你好好，因為我，亦都有人會挑剔你，亦都係因為我，呢個一定係均等嘅，我覺得咪做好你自己，咪去建立自己嘅價值觀，唔好因為人哋嘅批評或者讚賞而去改變咗自己嘅原則。呢個係我同佢一向溝通嘅大前提。佢OK嘅、佢都接受，同埋自細我就培養佢思考，我覺得人思考好緊要，我覺得我留幾錢畀你，冇用，總會使晒，唯一你能夠得到嘅，就係你識得諗嘢。因為思想係無限大，可以不斷發展落去。」

買衫扮靚靠囝囝

問黎耀祥買咩衫、買咩鞋，係咪都要經過形象指導、即係佢囝囝？黎耀祥笑言：「我個仔要求好高㗎，大家都知我以前著衫好求其，其實相輔相成，自己都明白，當你受注目或者有好多地方要去，衫要多啲、靚啲，去咩場合著咩衫，呢個係基本禮貌嚟。我個仔好得意，美學上我覺得佢OK，佢影相、睇衫每個角度都係唔錯，好多牌子都係佢介紹畀我，『今年呢個得，呢季出呢啲唔得』佢有呢啲角度，點解我都信佢，因為佢又唔係完全崇尚名牌，平嘅佢都會買，佢有時擺啲車嘅相唔係想咩，因為佢鍾意車又鍾意影相，佢影相幾靚，佢13歲已經攞住長鏡頭影相，不過我都會提佢做人低調啲。」