馬浚偉入行25年：直覺唔會攞視帝
撰文：東方新地｜圖片：新傳媒圖片庫、馬浚偉FB
馬浚偉 入行被噓足兩年
馬浚偉憶述入行第一間唱片公司係華納唱片，第一隻唱片係《幸運就是遇到你》：「當時Paco(黃柏高)簽我，喺華納三年，出咗三隻唱片。之後冇再做唱片，唔關當年唱片市道唔好事，係我自己第三隻碟唔賣得啫。我似唔似黎明？以前似㗎，特別係以前入行嗰時個髮型！」
講到當年首張大碟唱片公司用「他不是學友、他不是克勤、他不是黎明」做宣傳口號，馬浚偉笑言：「有行內人直頭話：『乜你唱片公司度句咁嘅嘢？害死你！』我真係畀人噓足兩年，但唱片OK、第一、第二隻都賣得嘅，但真係每次出場，好多其他嘅fans都會噓，佢哋未必會明白，句嘢都唔係我度嘅，但唱片公司咁度有冇原因呢？有！因為嗰時我9月出碟，負責同事話：『年尾嘞，你一定要有啲嘩眾取寵少少嘅嘢去吸引人注意。』我覺得『吓？』但我唔會怪佢哋，因為喺市場策劃上唔係完全冇道理，但的確令我條路難行咗，如果新人係要由零分開始，我嗰時係由負十分開始，去到《妙手仁心》出街，我係完全feel到啲觀眾另一種態度，個個好友善：『嗰個醫生仔，好得意、好好！』嗰時開始演藝事業有幾大轉變。」
滿足於自由身
講到入行以來嘅發展，馬浚偉表示：「事業上，我係屬於爬樓梯式嘅藝人，一級一級慢慢行，唔會有突然澎一聲或者突然間好低、好高，今年九月我入行就25年，我幾享受過往嘅歷程，當然有難行，有開心嘅、有唔開心嘅時候，感覺自己能夠掌握嘅嘢係愈嚟愈多，以前喺唱片公司去到無綫，喺無綫長大，去到離開無綫，有自己嘅公司、自己嘅製作、自己嘅團隊，一個藝人能夠掌控番自己嘅嘢，我覺得好滿足。」
問馬浚偉有冇試過經濟拮据？佢答：「坦白講，冇喎！因為我係一個幾穩陣嘅人，識我嘅朋友都知，我有投資，但我唔會做啲好進取嘅投資，投資上，我係非常保守，我賺十蚊，大概使兩蚊，我有八蚊係做咗投資或者儲蓄，而且我早出嚟做嘢，我13歲已經出嚟打工，我唔會有好亂嚟、好揮霍嘅歲月，so far好感恩，你話好富有？唔係，但我唔會夠膽講我有拮据嘅日子，我照顧到家人、照顧到自己、照顧到公司、照顧到我班同事，我覺得差唔多啦，算係咁！」
做電台得著多
講到查小欣曾大讚馬浚偉：「你睇馬浚偉幾紅，依家全世界都有聽佢個電台節目！依家做電台節目最紅係佢！」馬浚偉笑言：「多謝小欣姐，小欣姐一向都偏心我。點解會做電台？其實我好多年前，喺香港電台做過主持，港台第二台嘅杜雯惠一放假就搵我去頂，或者同佢一齊主持節目。我對廣播係有興趣嘅，亦都有班人話我把聲適合做電台，呢樣嘢烙印咗喺個心入面。去年商台《晴朗的一天出發》之後，有半個鐘頭嘅節目時間，係Stephen(陳志雲)做，我有聽，一路到曾鈺成先生嘅《鈺成千里目》，到田北俊先生嘅《田式生活》，到吳雨大哥嘅《娛樂大哥》，因為我好早起身，成日都聽到晒呢啲節目。有次同陳志雲傾開偈，我話：『有時間我做啦！』就係咁，《偶然・馬浚偉》呢個名唔係我諗，係商台陳聰、郭志仁知道我會再做《偶然・徐志摩》所以諗出嚟。」
馬浚偉指做電台節目有好多得著：「因為今次我全部嘉賓都係我自己約，有啲係我識嘅，有好多我唔識嘅，我真係厚住面皮，最後個個都接受我訪問，當中都有啲好有爭議性嘅嘉賓，譬如好多人唔明我點解會訪問陳淑莊、特首，咁多政界嘅人，我唔係特別鍾意訪問政界，而係我鍾意訪問唔同界別嘅人，而我喺節目入面唔係同佢討論佢嗰個界別嘅嘢，係我想透過我嘅節目去還原一個人。」
對獎項冇期望
問佢對獎項有冇期望？馬浚偉坦言：「到依家仲期望？有平台上有朋友、fans話：『你要加油，希望《深宮計》會攞視帝。』唔會㗎，我唔係話公司公唔公平，我覺得我將來有機會攞獎都唔係攞演員獎，最受歡迎男主角、男演員，我直覺總係覺得唔會，但我將來會唔會攞到編劇獎、導演獎、製作人獎或者舞台劇方面嘅獎、最受歡迎主題曲、插曲，唔知！但我唔會完全抹殺呢個機會，如果有日各地電視台願意頒畀我，我當然願意去攞，亦都當然會想，冇人唔想，但會唔會係我考慮嘅前提？對唔住，完全唔係。」
