隨時要成家立室 馬浚偉談感情狀況：結婚唔會隱瞞！
馬浚偉 入行被噓足兩年
馬浚偉憶述入行第一間唱片公司係華納唱片，第一隻唱片係《幸運就是遇到你》：「當時Paco(黃柏高)簽我，喺華納三年，出咗三隻唱片。之後冇再做唱片，唔關當年唱片市道唔好事，係我自己第三隻碟唔賣得啫。我似唔似黎明？以前似㗎，特別係以前入行嗰時個髮型！」當年首張大碟唱片公司用「他不是學友、他不是克勤、他不是黎明」做宣傳口號，馬浚偉笑言：「有行內人直頭話：『乜你唱片公司度句咁嘅嘢？害死你！』我真係畀人噓足兩年，但唱片OK、第一、第二隻都賣得嘅，但真係每次出場，好多其他嘅fans都會噓，佢哋未必會明白，句嘢都唔係我度嘅，但唱片公司咁度有冇原因呢？有！因為嗰時我9月出碟，負責同事話：『年尾嘞，你一定要有啲嘩眾取寵少少嘅嘢去吸引人注意。』我覺得『吓？』但我唔會怪佢哋，因為喺市場策劃上唔係完全冇道理，但的確令我條路難行咗，如果新人係要由零分開始，我嗰時係由負十分開始，去到《妙手仁心》出街，我係完全feel到啲觀眾另一種態度，個個好友善：『嗰個醫生仔，好得意、好好！』嗰時開始演藝事業有幾大轉變。」
馬浚偉 感情唔排除任何可能
問馬浚偉依家感情狀況係點？佢笑言：「未結婚囉！哈哈哈哈哈！我唔排除任何嘅可能性，特別依家大個嘞，我仲有好多理想想做，好多目標要做，但會唔會太忙，冇時間拍拖、結婚，我諗唔會嘅，只要有啱嘅人，點都會有時間。遇到合適嘅人，我係隨時OK，無論我嘅成熟度、思想、心態或者經濟狀況，要成家立室，隨時都得。你放心，到嗰日我會打鑼打鼓㗎！真係有呢一日，我係真係會擺酒，我唔會䁥埋去到好遠。」
講到馬浚偉主演嘅徐志摩舞台劇又再度公演，佢糾正：「正確嚟講，我首度公演係16年11月，做咗六場，跟住舊年我喺內地做咗六場巡迴，前後已經做咗十二場。今次暫定會做十一場。」而提到楊受成先生嘅太太與徐志摩第二任太太同樣都叫陸小曼，馬浚偉指：「好多網民都問陸小曼唔係楊受成先生嘅太太咩？我心諗你哋讀吓書啦！楊生嘅太太陸小曼我都認識，楊生個女我亦都識，楊生仲係我Facebook Friend，我一定要邀請楊生嚟睇！」
似徐志摩 堅持自我
對於徐志摩一個咁傳奇嘅人物，馬浚偉自言：「徐志摩對於嗰種自我嘅堅持，我睇到自己嘅影子，佢對於爭取愛、自由、美，我對美冇佢要求咁高，但自由係我好嚮往嘅，我永遠都唔容許自己嘅自由被剝奪， 如果我連自由都冇，我寧願早啲返上天家。我覺得人，自由係好重要，包括思想嘅自由、生活上面嘅自由，選擇嘅自由，我認為係好重要，呢樣嘢我同佢係好接近，佢嗰種奮不顧身，寧願粉身碎骨都要追求對美、對愛、對自由嗰種堅持，我好佩服佢，依家有幾多人真係堅持追求一樣嘢而寧願命都唔要或者犧牲晒自己擁有嘅嘢，唔係個個做到，但徐志摩做到，呢樣嘢我佩服。」
而對於徐志摩喺愛情方面嘅錯綜複雜，馬浚偉解畫：「其實佢唔係錯綜複雜，我寫劇本用咗七個月，但我研究佢嘅資料起碼用咗年幾、兩年，其實徐志摩對愛情好專一，大家覺得佢風流花心，當然(徐首任妻子)張幼儀好慘，但佢同張幼儀段婚姻係父母之命、唔係徐志摩想要，嗰個年代個個都三妻四妾，結咗婚遇到最愛咪納做填房，徐志摩唔愛張幼儀，到遇到鍾意嘅林徽因，佢選擇離婚，佢覺得要離婚先對得住林徽因，佢爭取戀愛、婚姻嘅自由，係咪有錯呢？我舞台劇入面都有highlight呢樣嘢。」
馬浚偉又透露佢空閒時愛讀書：「我依家睇書分咗四類，第一，EMBA(工商管理碩士)，另一個係咖啡，咖啡我讀緊個Diploma，兩樣都要上堂、有好多專業嘅嘢要讀，另外我讀緊哲學，不過係悠閒性，仲有太多未完成；再另外就係表演藝術嘅書，我好多時帶住書喺身，一有空閒就會睇。同埋忙公司嘅嘢，因為公司接觸嘅範疇愈嚟愈多。」
馬浚偉：要出去闖吓
問當日點解會離開又返番無綫？馬浚偉指：「我12年尾離開無綫，13年尾我已經以部頭約形式返去，拍咗《守業者》，去年再返去拍《宮心計2深宮計》，我諗喺唔喺無綫裡面唔係最重要，問題係個情感仲喺咪度。我自己第一集電台節目都請咗樂(易玲)小姐，當初我同佢的確喺工作上有啲理念唔係好一致，亦都有少少誤會，但我哋依家係好好嘅朋友，回想番，當初大家都有不足嘅地方，我哋私底下傾咗好多次偈。」馬浚偉續說：「我決定離開無綫，一嚟自己都到咗一個樽頸位，第二，做一個男藝人，應該要出去闖吓、要見吓出面嘅世界，同唔同嘅製作人合作，合作過先知道點樣再去提升自己。依家我同TVB都仲係部頭約嘅形式，啱嘅角色、劇本，我就會返去，如果唔係，我都會畀自己繼續喺出面自自由由，依家我身上冇任何一張合約，我只簽畀我自己公司。」
對收視冇壓力
而講到再返去拍《深宮計》嘅感受，馬浚偉表示：「《深宮計》真心講，係好值得睇嘅一套劇集，佢係騰訊投資，同無綫合作嘅合拍劇，第二係全單機拍攝，以往拍電視係三部機拍，今次全部係電影咁嘅形式，每一個鏡頭都要執一次燈，所以拍攝期好長，每日拍攝嘅時間好長，但出嚟嘅畫面、效果真係好靚。」問佢對收視有冇壓力同期望？馬浚偉笑言：「冇嘞，依家唔會再有呢啲壓力㗎嘞，因為依家嘅收視計法都唔同晒，以前冇咁多平台，以前大家要睇真係要喺電視睇，加上依家內地嘅平台可能快過香港，嗰度都搶咗啲收視，我全經理人合約拍無綫最後一部《當旺爸爸》，第一個禮拜收視都三十點，嗰時三十點係門檻嚟咋，依家收視點計我都唔知嘞，總之我嘅心態就係最緊要觀眾覺得好睇，收視對我嚟講，都唔介意，當然希望收視好啦！」「個故事講我飾演嘅唐玄宗李隆基，我同太平公主陳煒本來一齊對付我阿哥，後尾各自心懷不軌，佢想做女皇帝，我想做皇帝，就展開鬥爭。今次《深》唔淨止女人嘅鬥爭，鬥爭會更加複雜，人物會更加多。」
抗拒做正義L
提及網民指馬浚偉最適合演清裝，而且大部分都係演正面嘅角色，馬浚偉直言：「我承認我好適合演清裝，其實我自己都鍾意，我好鍾意剃光頭，因為我好怕打理頭髮，每次拍清裝啲人覺得我好大犧牲，其實我心裡面諗『正，呢半年又唔使整頭。』同埋我個頭形前面好圓，的確幾適合清裝頭，所以我自己係鍾意嘅。至於網民話我做親都係正面嘅角色，你咪講得好聽，通常呢啲叫正義L，我認，我自己都怕，所以由我離開無綫再返去，我已經講唔好再搵我做好人角色，我唔想做，(梅)小青姐兩年前搵我做《深》，我第一個條件就話純老正角色就唔好嘞，觀眾睇得辛苦、我自己都悶。所以個個都話徐志摩係渣男，我就係想做呢啲囉！」
