離婚後經濟壓力大 羅霖：好擔心無嘢做！
撰文：東方新地｜圖片：新傳媒圖片庫、羅霖IG
羅霖 經濟有壓力
離婚後，羅霖要靠自己從頭開始，首先要面對的是經濟上的困難：「尤其係頭幾個月，我真係咩都無、由零開始，只可以同細仔搬番我媽咪度住，當時我同細仔瞓一張床，細仔都問我點解要住咁細嘅房、瞓埋一張床，我話：『你畀啲時間媽咪，我會努力做嘢，搬出去租屋住。』嗰刻我下定決心，到佢瞓著我就喊。」
離婚近六年，羅霖直言經濟隱憂仍未解除：「三個仔學費、生活費各樣支出都好大，尤其係去國外留學，每年加埋食宿三十幾萬，去美國更加貴，每年接近五十萬。當初分開，協議我負責生活費，佢(前夫)負責學費，但過咗都無一年，佢話淨係負責兩個大仔三分一學費，對我嚟講壓力好大，依家三個仔都同我住，佢哋都生性，有時做吓暑期工，我最希望佢哋可以經濟獨立，因為講真我年紀唔細，都唔知可以喺呢行做幾耐，有時壓力大，我都會喊住咁祈禱。」
寧願自己辛苦
除了經濟上，少不了單親媽媽母兼父職教育三名兒子的壓力：「依家啲小朋友好有主見，但亦經唔起挫折，遇到困難可能會放棄，要不斷支持、包容、鼓勵，好多嘅愛同耐性，加埋我要做嘢，有時都幾心力交瘁，但作為媽咪，永遠都係支持、唔放棄佢哋，譬如大仔喺外國讀完三年，本來仲有一年畢業，但佢話要轉major(主修科目)，要由頭嚟過，當時我覺得：『你咪嘥咗我啲錢？七位數字喎！我真係做幾份工捱通宵，做到喊㗎喎！』我沉澱，問自己：『你想個仔健康快樂，定繼續讀佢唔開心嘅嘢？』咁我寧願揀我自己辛苦啲，但我同大仔講：『你唔好成日轉，因為我仲有兩個細佬要供！』」
奇怪羅霖當年嫁入豪門，離婚後卻時刻為錢頭痛，羅霖爆前夫劉坤銘從未支付贍養費：「一向都無，無錯，法律上係要畀，但當(對方)可以證實到銀行啲錢係少過我，當然之前做咗好多功夫啦⋯⋯唔緊要，只要個天畀我有工作，我每日祈禱就係有嘢做，我唔怕辛苦，無嘢做我就擔心嘞！」
一日食五餐keep fit
年過半百，又是三子之母，偏偏羅霖胸是胸、腰是腰，比例勻稱，而且應大則大，盡顯女性曲線美，攝影師邊影邊讚不絕口，直教青春少艾汗顏，說到保養方法，羅霖琅琅上口，媲美坊間自居的美容纖體專家：「少食多餐，一日可能食五餐，主要食蔬菜、魚、雞，我由細到大都唔鍾意食牛同羊，但無辦法我個名叫Candy，甜品戒唔到，飯又戒唔到，晚晚一定要食飯。」
「我有少少懶，通常做運動係拍電影，或者好似之前影寫真，就會的起心肝做，平時多數喺屋企伸展吓，做五至十分鐘伸展運動，每個月推一至兩次脂，keep住身形，做瑜伽都可以，身形會靚，但就唔會做gym，因為肩膊會橫，好容易畀人感覺肥，骨架細會靚啲。」
離婚後無感情生活
既保養得宜，追求者自然也不少，傳聞裙下之臣涵蓋老中青，傳得最火熱要算跟年輕廿載的內地富二代J君「母子戀」，微博上有感而發傷春悲秋也會被聯想成感情有變，眼前的羅霖卻一臉正色否認：「一直以嚟都係朋友，出街食飯就有，正式去嘗試(拍拖)真係無。」原來外間一直高估了她對忘年戀的接受程度，「雖然人唔係為其他人生活，但(年齡)細太多社會輿論都會有好大壓力，相差幾年OK嘅，十幾年我未必會接受。」
曾代理紅酒生意並親身上陣拍廣告，被年輕內地追求者J君追到法國，自薦做男模合拍婚紗照，羅霖說：「我未影過婚紗相，難得公司畀錢我去到古堡咪影。」
羅霖更強調自離婚後一直單身，「啱啱離婚嗰時，都有啲朋友追嘅，後尾見我咁勤力投入工作，無時間同佢哋去街，就愈嚟愈少嘞。兩年前做嘢太辛苦，都諗過有個膊頭挨吓、倚靠吓，但我已經好大壓力，如果再投入一段感情，感情一定有開心同唔開心，我唔想因為拗撬再加重我壓力，所以我決定暫時唔投入住，到啲仔畢晒業，如果都仲有人等我，咁搵番個伴囉！如果無就算，孤獨一生囉！」
「朋友」冷言冷語
離婚、出寫真、重返幕前，羅霖說外間觀感有好也有壞：「難聽嘅說話反而來自我以前嗰啲所謂嘅朋友，你都知所謂上流社會好現實，見到面都唔打招呼，或者冷言冷語，我會覺得係好事，畀我知邊啲係真正朋友。反而我出到街好多女士會走埋嚟同我講：『加油、我支持你！』我好感動。」
回想離婚後的經歷，羅霖說：「我外表好柔弱，但我可能捱得，個天畀啲磨練我，令到我堅強。」
女人當自強
羅霖又寄語女性：「結咗婚唔係一世就係咁，有好多突發性嘅嘢係預料唔到，我覺得如果可以兼顧到，都做吓嘢，一嚟增值自己，二嚟唔使咁無安全感，當自己賺到錢，就真係有安全感嘞。」
早前農曆年假羅霖跟幼子到北海道旅遊：「細仔鍾意滑雪，上年我有工作陪唔到佢，佢跟咗我啲朋友去，日頭玩得好開心，夜晚就掛住我，所以今年我爭取賺多啲錢同佢去滑。」
索爆美魔女寫真
羅霖現52歲，是1991年亞洲小姐冠軍，她在2015年推出首本寫真《Timeless》，以50歲美魔女為賣點，書名《Timeless》，是不是想告訴大家女人的美貌是不受時間限制的、不朽的呢？雖然當時惹來一些執相疑雲，但無可否認寫真裏散發著自信的女人魅力。
羅霖這本個人寫真集專誠飛到首爾取景，更請來曾與金宇彬、池昌旭等著名韓星合作嘅攝影師操刀拍攝。羅霖表示相集並無任何添加，非常natural，以真面目示人！
