張彥博 曾組band後解散

現年43歲、天生一副童顏baby face被指激似小豬羅志祥的張彥博，05年以赤子樂隊成員身份出道，三年後樂隊無聲無色解散，對歌手夢唔死心的他，年前先後參加內地歌唱比賽《聲動亞洲》及《快樂男星》，均未能為他帶來獎項。

阿博年前參加《聲動亞洲》，已被國內傳媒指似小豬。

人氣爆燈幾日冇瞓

兜兜轉轉至2013年加入無綫藝員訓練班，翌年8月訓練班畢業後，被派在十多部劇集中演保鑣、家丁等連名都冇的閒角，最終憑不老萌樣演活《一屋老友記》廢青細寶殺出血路，一時間人氣爆燈，工作排得密麻麻，同時兼顧《一》劇宣傳及新劇《翻生武林》拍攝的他，直言「幾日冇瞓」！

張彥博憑《一屋老友記》萌爆四弟角色細寶上位，天生童顏的他，35歲起步也不算太遲。

張彥博由閒角突變紅人，拍緊古裝劇都要戴住頭套分身為《一》劇宣傳。

食即食麵食到入院

在髮型屋抽空接受本刊訪問時，張彥博講及以往坎坷經歷時，仍脹紅臉泛起淚光，他說：「搞樂隊之前，我喺電腦公司做，嗰時已經好窮，得六千蚊人工，同朋友夾份每個月俾三千蚊租屋，試過一個月裏面每日三餐都食即食麵，因為十蚊可以買到三個麵煮，結果食到塊面紫色，好似中咗毒咁要入醫院，從此我發誓唔再食即食麵！」

重提昔日辛酸，細寶禁不住面紅紅熱淚盈眶。

細寶張彥博眼大面細青靚白淨，識音樂、有樣有才華，難怪被電視迷熱捧為新男神。

日前自攜私伙結他為無綫劇《完美叛侶》宣傳後，再到尖沙嘴天星碼頭玩快閃表演。

戶口曾冇錢

「到搞赤子(樂隊)嗰三年，冇出過糧，靠教樂器維生，但好唔穩定，戶口係冇錢，搭車都要問人借，要靠屋企人support。」赤子解散後，曾在附有舞台的餐廳工作，為表演者set樂器，由被簇擁的歌手變成侍奉別人的幕後人員，坦言亦曾感到不快，但身為基督徒的張彥博最終靠信仰度過。

接受本刊訪問時自彈自唱自己作曲、跟裕美合唱的〈愛上未愛上的你〉，未知是否當年追裕美時的示愛歌。

結他不離身，經常帶住結他趁拍劇空檔練歌、jam歌，年前曾將跟蔣志光所jam的〈好久不見〉upload上網而獲陳奕
迅注意。

忙足一日，最後返回租住、旺角區51年樓齡的單棟大廈。