從姐仔屠夫到街市殺手｜吳卓羲 陪爸爸走過最後日子
撰文：東方新地｜圖片：新傳媒圖片庫、吳卓羲IG
吳卓羲 陪爸爸走過最後的日子
訪問開始，提到15年爸爸因為癌症去世，問吳卓羲最記得佢嘅係咩？吳卓羲憶述：「好多⋯⋯太多⋯⋯佢個人好cool，最記得就係小學帶啲同學返屋企打機，佢成個關二哥咁坐咗喺度睇住我哋玩，唔識笑⋯⋯哈哈。有打我嘅時候、有鬧我嘅時候，不過成日赤手空拳咁教訓完我，又好錫我喎，會買架單車畀我，因為我鍾意⋯⋯佢走嘅時候，我喺佢身邊，嗰年(2015年)我離開TVB，所以真係有時間可以陪住佢。」
吳卓羲續說：「最後嗰幾日，都係我坐喺床邊，陪佢傾偈、幫佢抹身，最後嗰幾日，佢係彌留狀態，但我知佢聽到嘅，知我同佢講：『放心啦，阿媽我會照顧好佢。』我喺嗰年經歷咗兩個人離開，喺上海拍緊《梟雄》時婆婆走咗，我乜都唔理，一定要坐飛機返香港，佢哋兩個，我都係握住佢哋嘅手離開。一定有遺憾，但係佢哋起碼知道，我返咗喺佢哋身邊。」
萬般帶不走
人一世物一世，問吳卓羲覺得行完呢一個旅程，最重要留低啲咩？佢話：「最重要係問心無愧、心安理得，要過得人都要過得自己。萬般帶不走，揸咩車買咩樓，其實都唔重要，最掛心最放唔低，咪又係你愛錫嗰啲人？」
問佢講咩最氹得阿媽開心？吳卓羲笑言：「咪是非囉！哈哈⋯⋯有時三哥三嫂同林峯去我屋企玩，佢最開心就係有人陪佢傾偈睇電視。以前嗰十幾年係我返到屋企佢已經瞓咗，跟住佢未瞓醒我又要出門口再拍過，阿媽成日以為我冇返過屋企。」
吳卓羲感慨續言：「爸爸患嘅係最難check到嘅胰臟癌，到發現時已經病發去到尾期，當一個好親嘅人被判死刑，其實真係可以做嘅嘢唔多，只能夠陪伴，盡量喺佢身邊。製造回憶呢樣嘢真係好緊要，所以依家我想同媽咪補償番過去十幾年冇時間做嘅嘢。」
從姐仔屠夫到街市殺手
喺電視台捱咁多年，有冇七勞八損捱到內傷？吳卓羲直說：「梗係有，肝啦大咗兩公分，飲食唔定時，又傷胃又有高血脂。呢幾年先至似番個人，食中藥調理吓，又做到運動降番咗血脂，仲有最開心係可以陪阿媽去街市，我真係好鍾意搭住佢膊頭去睇海鮮：『喂呢個貴啲喎⋯⋯』然後聽佢同人講價。依家大個仔，最鍾意咁樣，最想畀阿媽食好啲住好啲、喺我能力範圍畀最好嘅佢。」
冇拖拍變宅男
有冇帶過女朋友返去畀阿媽睇？吳卓羲答：「冇！」記者再問：咁多年咁多個都冇？佢反問：「有幾多個呀？好多係緋聞，唔係真喎！我唔回應啫，唔係個個都係我㗎！依家有冇拍拖？梗係冇啦⋯⋯依家多咗生活，但係少咗出街⋯⋯哈哈，反而變咗宅男，愈嚟愈覺得唔梳頭髮留喺屋企最舒服。」
同前度冇時間了解
而講到好朋友三哥有三嫂、陳山聰都有個陪佢度過難關嘅女朋友Apple，唔羨慕咩？問佢以前咁多個，有冇邊個係錯過咗，那些年後想追番？吳卓羲直言：「梗係想，有個另一半幫我處理晒啲雜物你話幾好？以前嗰啲過咗去就唔好再講，重點係以前一齊冇諗過咁遠，唔係我唔想有將來，而係你想有將來係唔係要互相了解吓先？但係我根本就冇時間同佢互相了解⋯⋯」
好想做老竇
咁多年冇試過身邊有一個人、第一件事想同佢分享，唔掛住咩？吳卓羲笑言：「呢個感覺久違到已經唔記得咗有咩咁好，既然唔記得就更加唔使恨。依家做完嘢，我冇邊個想見想搵，最想係咩都聽唔到，畀我靜吓。我都好想做老竇，有時見到朋友有家室、生晒仔，都會諗吓有一日我做爸爸會係點呢？」
教下一代唔好害人
最後問吳卓羲如果做爸爸會點教育下一代？覺得為人處事、喺一個行業可以立足，最重要係咩？吳卓羲表示：「唔好怕蝕底，同埋唔好害人。講真，一個人蝕得幾多呢？同埋你有眼見，立心不良只會自食其果，呢啲嘢同呢啲人，呢幾年我真係見唔少。」
吳卓羲 大個仔愛黐家
吳卓羲呢幾年離開無綫走南闖北果然搵到錢亦都修心養性變成熟，記者以往撞到佢唔係拖住女就係揸住戰車約朋友去夜街，早排竟然天都未黑就坐保母車打道回府返大埔屋企。見到記者個鏡頭，吳卓羲一啲都冇唔自在，反而保持笑容、不斷揮手打完招呼又講再見，呢啲咪大個仔囉！
吳卓羲近年勇闖電影圈，啱啱又忙住要宣傳新劇《飛虎之潛行極戰》，睇怕都係捱到唔多夠瞓，日光日白口腫面腫，不過見到記者都仲識得打招呼。
往日難得返香港一定係自駕戰車周圍飛番轉，如今大個仔穩重咗，吳卓羲有機會都係等司機代勞，自己爭取時間休息吓先。
天都未黑，吳卓羲竟然冇街去，自稱冇拖拍又變得黐家，果然有時間寧願早啲返屋企。
15年爸爸去世後又離開無綫，吳卓羲都話開始珍惜同屋企人相處，一得閒就會陪媽媽去大埔街市買餸。
