男女因「AA制」大打出手 牛角老闆FB爆真相
廣告
港男港女大打出手！事緣前日 (4月23日) 一對初次見面的男女，相約在旺角日本燒肉店「 牛角 」晚飯後，因金錢糾紛發生爭執及打鬥，有指當時女方希望男方請客，不過男方卻要求「AA制」，兩人初則口角繼而動武，最後雙雙被捕！事件引起全城討論，身在日本開會的「牛角」老闆黃傑龍 (Simon) 亦高度關注，今日佢喺其FB專頁交代事件，真相原來另有內情！
疑因「AA制」開拖
話說當晚37歲姓翁男子相約38歲姓黃女子到「牛角」晚飯，據知兩人只係在網上相識兩日，當晚初次見面，係因為討論將遊戲機放上網賣的事宜。飲飽食醉後，店員送上銀碼約2,200元的帳單，據稱期間有人要求「AA制」夾錢，於是兩人發生爭執，後來更不顧儀態動武，拳來腳往！店員阻止無效下最終報警求助。
老闆解畫
日前身在京都的「牛角」老闆黃傑龍 (Simon) 高度關注呢件事，佢今日喺其社交網站交代事件，上載兩人當晚的帳單，可見除了多碟肉類外，兩人仲叫咗三枝清酒、三枝啤酒加埋汽水飲品。單單飲品已經差唔多1,200元；而食物就大約700幾元，最後成張單$2,135.1。三個幾鐘慢慢食慢慢飲，其實又唔算好過分。
男方霸氣撕銀紙
咁到底係咪因為男方要求AA制而開戰呢？Simon越洋向同事了解後，發現原來係男方準備用現金付款時，女方禮貌地建議不如AA制，並將一張500元紙幣遞俾對方。點知男方不但唔領情，更霸氣地將紙幣撕爛 (好似係犯法？)
不過由於事件已交由警方調查，所以「肢體碰撞」的部分Simon就不便多講。Simon喺文末仲幽默咁話「呢對客人其實好可愛，雙方都係性情中人，我真係衷心祝福佢哋繼續做到好朋友」，唔通呢啲就係不打不相識？
抽水功力高超
Simon老闆真係夠晒幽默，事件初初爆出時，佢話要請教兩位客人點樣可以食2千幾蚊，懷疑兩人浪費多過食！而今日「牛角」隨即再推出「AA祭二人餐」，叫大家燒出愛火咁話！真係維港啲水都俾佢哋抽乾啦！
