思家大戰|家英哥斗膽嫌老婆大洗汪明荃向John哥單眼求讓賽霸氣爆料琳琳姐脾氣差
由李思捷主持及監製的《施巴 pH 5.5 潔膚浴露呈獻:思家大戰》第三季,逢周日晚 8 時 30 分翡翠台播映。本周日(13 日)播出一集,有「夫妻檔」汪明荃及羅家英攜手率領的「荃家高瑩俊」隊,成員包括粵劇拍檔謝曉瑩、郭俊亨及負責音樂的高潤鴻師傅;對戰林夏薇率領的「寵愛 Pet Pet」隊,成員有姜大衛(John 哥)、周嘉洛、徐榮及古佩玲。
家英哥忽然高呼:I Love You 阿姐嗌毛管戙
今集「荃家」絕對是焦點所在,家英哥無時無刻吼準機會發表「愛姐宣言」,當思捷問到他對粵劇與電影的看法時,家英哥即賣口乖謂:「我拍電影就家肥屋潤,娶到老婆啦!」引發全場尖叫;之後問到夫妻愛情保鮮法,家英哥即九秒九捉緊阿姐玉手:「因為我哋經常拖手仔行街」,更忽然向阿姐高呼:「I love you!」嚇至阿姐打冷震謂:「嘩!毛管戙!」雖然阿姐把口咁講,但其實頻頻忍不住冧笑、相當嬌俏。
![「寵愛 Pet Pet」隊右起)徐榮、姜大衛John 哥)、林夏薇、周嘉洛、古佩玲。](https://imgs.orientalsunday.hk/wp-content/uploads/2023/08/image_prefix_2_179067216764d5b725794b1.jpg)
全程情緒高漲的家英哥亦有甩碌,事緣思捷追問家英結婚多久,家英還未開口阿姐已瞪大雙眼望到實,嚇至家英哥即時口窒:「我係 0…09 年結婚嘅,14 年喇。」當回答「問咗 100 位已婚男士,硬係覺得人哋老婆有咩好過自己老婆」時,家英哥竟衝口而出答「慳家」!令阿姐即時成為被狙擊對象,思捷更起勢拿阿姐身上衣服作話題,阿姐即精靈拋出一句成功扯開話題:「最緊要睇吓(答案)啱唔啱先。」阿姐今趟確是求勝心重,還未正式開始遊戲前,已擺明車馬恨贏:「我擔心我遊戲玩唔掂,點算呢,(向著思捷)你有冇貼士呀?我想今晚攞你嗰五萬蚊 and 禮品呀。」阿姐及後更搞笑地應思捷要求,向 John 哥嬌俏地單眼撒嬌求讓賽,氹得 John 哥開心表示:「我攞咗畀你哋!」難得大晒表情包的阿姐,與薇薇搶答問題時,又興緻大發與薇薇合唱「經過那些年~」,齋睇牌面都知全晚節目高潮迭起。
John 哥的幽默度亦不輸「荃家」,當思捷問 John 哥與成班後生仔合作拍劇有何挑戰,John 哥一本正經說:「咩挑戰啫?學嘢咋嘛。大把嘢學啦,佢哋講嘢行路都唔同架。」更隨即做出「縮頭縮腦」動作兼指著周嘉洛,又大爆嘉洛冇時停。而
![阿姐同家英哥默契十足,家英哥仲大顯幽默本色添。](https://imgs.orientalsunday.hk/wp-content/uploads/2023/08/image_prefix_4_197810072164d5b726509de.jpg)
回答「人哋老婆有咩好過自己老婆」時,John 哥毫不畏懼飛出「脾氣」二字,思捷追問其太太李琳琳是否脾氣不好時,John 哥再度視死如歸謂:「絕對係!」令思捷忍不住笑言:「琳琳姐!我知你睇緊架!」至於未開口已自覺「答咩都死」的徐榮,最後臨急臨忙諗到簡單一句化解危機!到底係咩?阿姐最後又能否得償所願贏得五萬蚊獎金 and 獎品?密切留意新一集《思家大戰》。