YouTuber拍片侮辱港人被狂轟｜問哪裏有妓女及貓狗…
原文：東方新地｜圖片：YouTube、Instagram
YouTuber拍片侮辱港人被狂轟
YouTuber RiceGum早前發布一條名為《Why I Left The Clout House (im sorry)》的影片，記錄到訪香港兩日的遊歷。不過一開始佢到埗，就故意在「Hong Kong」旁邊配上日本國旗，有人話呢位YouTuber對中國好反感？小編就覺得係佢某啲地方要去驗一驗……
｜見到牛雜問係咪狗肉
之後片段見到RiceGum四圍問人有冇貓肉或狗肉食，見到麵店一大鍋牛雜後更大呼小叫，講咗句「呢鍋係唔係狗肉，我覺得很噁心」，又不停問途人「邊度有狗或貓？」似是嘲諷中國人吃狗肉。
翻查資料，其實香港早在1950年已立法禁止食用貓狗肉，根據現時香港法例中的《貓狗規例》，如屠宰貓狗和售賣貓狗肉，可處罰款 $5,000及監禁6個月。以為好好笑，其實顯得自己無知…
｜扶手電梯亂摸人
另外，RiceGum同其拍擋唔止言語上滋擾香港人，喺扶手電梯上故意觸碰其他人的手，其實如果唔係香港人有文化、或者比較好老脾，應該轉過身就追上去打_佢… 或者報警拉佢非禮？
｜小學雞入展示櫃搗亂
跟住係小學雞都唔會做的幼稚行為，闖入服裝店展示櫃搗亂，將假人模型的衣服掀起，甚至擺出意淫動作。都係嗰句啦，佢哋有啲地方應該要驗一驗……
｜落閘照闖入
又見到RiceGum同拍檔走入正在落閘的鞋店，就算職員告知已關門都依然闖入，仲拿起鞋架上的鞋子。
｜要人食口水尾雪條
將食剩下一半的雪條送俾途人，並要求途人食咗佢？已經唔係好唔好笑，而係人格同智商的問題……
｜要求性服務？
問完貓肉狗肉都未夠，RiceGum就開始問「邊度可以召妓」，仲走去問一位派發按摩店宣傳單張阿姐：「You guys have happy ending?」「Happy ending」字面意思僅「快樂的結局」，但其實係問該按摩店是否提供性服務。
｜網民有話兒：
｜歡迎大家留言
網民群情洶湧，RiceGum的各大社交平台都被留言瘋狂鬧爆，如果大家都有意見反映，都不妨去留個言…
呢位叫RiceGum的YouTuber為美國網絡紅人，其YouTube頻道擁有逾1000萬訂閱者，Instagram粉絲都有成5百萬，所以話人人喜好各有不同，香港人睇完嬲爆，同時都有大把人like爆，完。
