JW王灝兒甩21磅細兩個碼自爆一個原因所致

JW小背心騷Quali

JW（王灝兒）入行已經好有肉地，四年前撻著12億卓悅太子爺葉韋彤（Tarzan），一副唔憂做心態等做豪門少奶，工作量唔算多，全副精神融入男友富貴生活圈子，心體廣胖。這日她卻穿上昔日的迷你牛仔短裙，用手拉開裙頭，的確瘦足兩個碼，有近半個身形的空位；同時她又晒出以火辣小背心，配短褲上陣洗車的片段，盡騷苗條身段。

蔣家旻質疑JW之前磅數

去年開始，JW為無綫拍了《逆天奇案》及《欺詐劇團》，最近又開拍《痞子殿下》做第二女主角，她自爆身材有變是因為拍劇所致，不過好友蔣家旻就質疑：「你以前有冇咁肥呀？唔信！」JW即表示：「我成日著啲好大件嘅T恤遮住。」又笑指：「我上年年頭嘅體重真係自己都嚇親。」而好友生煎包王子蕭唯展都向JW請教瘦身方法，JW就邀請對方：「同我一齊拍劇。」

JW條路自己揀

JW一直被指等嫁，不過拍拖4年男友未有脫單計劃，至今婚期未有著落，JW惟有女人當自強，去年8月宣布加盟星夢娛樂，硬攻歌影視三棲，早前JW指自己已跟TVB加簽經理人合約，正式開始演員生活，仲話自己一直好恨拍劇。

JW被億萬男友拖婚

JW加入星夢後氣勢如虹，除了要在頒獎禮搶獎，更歌視同時發展。至今JW已有兩套劇完成拍攝，分別是《逆天奇案》及《欺詐劇團》。原本有傳JW會在《欺詐劇團》擔正女一，無綫為捧她更巴閉搵金牌監製潘嘉德回巢操刀，不過當提及男女主角人選，監製德哥卻直言：「對燈發誓，我冇份揀主角！」最終JW只擔任劇中配角，主角落實為蔣家旻。但睇嚟備受無綫力捧的JW，將來有機會可以跳過監製揀蟀一環。

JW與卓悅太子爺葉韋彤經常人前放閃，拍拖四年屢傳婚，不過一直只聞樓梯響。二人不時被影到行街，之前JW身形一直保持圓潤，被指同男友襯到絕。

出道十年的JW，15年離開黎明A Music轉到小型唱片公司發展，亦開始放慢演唱步伐，近年幕前演出不多，一副唔憂做姿態。過去五年最大Project，是18年1月才舉行首個紅館個人演唱會。JW更指現時體型比演唱會時更瘦﹗

JW15年過檔小型唱片公司，推出歌曲〈矛盾一生〉在網上大受歡迎，17年與坤哥合唱〈原來只因深愛著〉，之後無以為繼。

JW惟有寄情工作

JW近年可謂優哉游哉，經常做跟得女友陪男友出入馬場及生意應酬，不時在社交網分享同男友的家庭生活放閃，以為她快嫁人上岸，但原來JW太子爺男友仍然享受單身，至今未有結婚計劃，想升呢富貴人妻冇著落的JW，惟有寄情工作。據知情者透露：「同Tarzan（葉韋彤）拍拖之後，呢幾年JW已經冇乜事業心，寧願爭取時間陪男友，Tarzan出去生意應酬JW亦跟到實，為咗冧Tarzan又學整嘢食同陪打乒乓波，仲行埋奶奶政策，成日傍實未來奶奶出入，成個新抱仔咁款，明眼人都睇出佢有顆恨嫁嘅心，不過Tarzan就唔係咁諗，寧願同JW過吓同居生活先，搞到長期倚賴男友嘅JW，耐咗都覺得冇乜安全感，呢排仲好積極話要再衝事業㖭！」

JW早已融入男友的家庭及生活圈子，今年農曆大年初一，JW在男友豪宅與男友一家團拜。

雞仔聲難入咪、外形條件限制多

去年10月中JW開拍的劇集《欺詐劇團》，男主角是以部頭約回巢的敖嘉年，據知該劇演員名單還有鄭丹瑞、蔣家旻、張秀文、星夢新人劉子碩及上屆冠軍港姐黃嘉雯。不過對於毫無演出經驗的JW，外形條件限制多，有幕後爆料：「JW冇演戲經驗，又得嗰五呎高身材矮小，外形已經輸蝕，想搵男主角襯佢都唔容易，而且佢講嘢同唱歌好唔同，講嘢把雞仔聲好難入咪，如果真係拍戲，有好多嘢都要改進，無綫夾硬捧佢上都算好博！」