李佳芯完美演繹新手媽咪辛酸《BB來了》首集內容勁貼地

《BB來了》首集內容勁貼地

《BB來了》第一集就如劇名一樣，講述女主角唐恬兒（李佳芯飾演）與男主角葉致廷（黎諾懿飾演）是新婚一年，仍處於甜蜜期的夫妻，二人正為事業拼搏期間，卻突然意外有了BB，結果將一切計劃打亂。

劇中，李佳芯飾演一位名牌買手，平日食好著好兼經常出入高級場所，加上備受公司重用，故準備到巴黎受訓一年後，就可以平步青雲晉身管理層。

但點都諗唔到，當事業正值高峰期，卻卻意外懷孕，並因為一個小生命的來臨，而需放棄一直所追求的一切，李佳芯在面對生理同心理極大轉變上，完美演繹出女強人忽然做媽媽忐忑不安心情！

李佳芯不禁向老公表現出對未知的未來感到非常害怕外，並直言：「你知道我犧牲了多少嗎？你知道一個女人懷孕代表什麼嗎？係事業、身材、樣貌各方面即時賭上」

相信這幕必定係唔少新手準媽咪的心聲！

李佳芯七情上面，仲喊哂口同老公講自己內心除咗不安、擔心外，其實仲有害怕的感覺！

李佳芯本身樣靚身材正，於劇中她除咗係一名女強人，同時亦是一位十分著重自己外觀的現代女性，故懷孕後面對身體變化，小肚開始遮唔住，塊面又暗又多粒粒，陀仔個鼻又紅晒，對她的確是一大衝擊！

作為一名愛美麗的女士，要由一個本身身型纖瘦的靚女，變成一個師奶，仲要唔知生完bb後能否修身成功，一個又一個未知之數及犧牲，無疑引起唔少女士們的共嗚！

劇中，兩公婆住開放式單位，加上一人一份糧，每月出糧可以有錢買衫買酒得閒出埠，享受輕鬆人生。但面對BB的來臨，開支馬上變大，例如產檢兩星期至一個月覆診一次、順產4萬開刀7萬等，樣樣都係錢。

另外，陪月、買BB車BB床奶樽奶粉等，淨係陀BB十個月加出世，都已經十幾二十萬，兩公婆原本預期的中產生活變成泡影，在毫無準備下，財政壓力變大，生活上的確好大打擊！

話說李佳芯本身就備受公司賞識，準備到巴黎受訓一年，但因為有咗BB，無論是陀緊BB定坐月，都不適合於外地逗留太耐，所以她只能無奈選擇放棄晉升機會。

面對奮鬥多年的事業，明明大好機會擺在眼前，卻只可眼白白望住機會溜走，一直以來將時間及心血放於事業，最終只能忍痛放棄，箇中痛心疾首的感受相信非一般人所能明白！

劇中，李佳芯除咗係一位事業型女強人，同時亦是自食其力靠自己賺錢改善生活的人。她即使嫁了有啲家底的黎諾懿，飾演她奶奶的Madam Lo不時以「生仔就幫手俾首期」，利誘新抱生b，反令李佳芯十分反感。

除此，劇中飾演李佳芯媽咪的陳秀珠又不斷催個女生bb，又自覺自己湊大十幾個BB又聲稱讀咗陪月課程，對於湊b 絕對綽綽有餘，點知人中被女兒發覺原來媽咪都好唔專業，生咗都唔放心俾阿媽湊。

關鍵詞