黎明認戀女助手 狗年做老竇
撰文：東方新地｜圖片：新傳媒圖片庫
51歲黎明 即將做爸爸！
黎明今日下午喺會展出席活動，Leon貫徹對感情事低調作風，不接受傳媒訪問，但見他全程笑笑口表現好風騷，心情超靚，活動完結後他即返上水豪宅。
未幾黎明在其FB專頁寫著﹕「兩個經歷過離婚的人，有機會走在一起已是一種缘份，有了的小生命更將令我成為父親，并帶我進入人生中另一階段。我作為父親必須保護好我自己的家人，更不願意讓家人隨便曝光，相信作為家長也會有同感。對於我們的將來，就交给時間去證明一切。2018年3月19日! Leon” 」
黎明 預告不接受訪問
今日大會事前張揚話黎明不會受訪，出席活動後會即刻閃人。活動開始時，黎明身穿白裇衫襯蝴蝶冷衫現身，他獲大會安排坐於嘉賓席，見Leon面露微笑和同場嘉賓有傾有講，心情明顯靚爆。
活動後急返家
活動結束後，黎明未有回應記者提問，急坐七人車返回位於上水雙魚河St.Andrews Place的6千呎獨立屋。
黎明女助手新寵曝光
外界都以為黎明未走出情傷，但其實他去年已有著落，與其唱片公司AMusic的女助手阿Wing過從甚密！獲黎明寵幸的阿Wing進駐上水雙魚河St.Andrews Place的6千呎獨立屋，又在AMusic任營業部經理，可以話係打晒骰。成為天王新寵不特止，本刊近日再次收到可靠消息，指阿Wing狗年報喜將榮升人母，現時陀B六個月！
黎明新寵阿Wing 陀B出巡
這段養胎日子，阿Wing繼續自由出入黎宅，早前本刊拍得黎明由司機接載離開寓所工作，之後阿Wing獨自駕車外出，直駛沙田「Homesquare」，該處集中售賣家具及家品。現場所見，阿Wing當日身穿白色薄羽絨內襯黑色連身短裙，下車後清楚可見佢腹部已明顯隆起，目測已懷孕六個月以上，不過佢未有水腫，而且健步如飛。
睇中七人車
據知阿Wing已為生B作好準備，早前把頭髮剪短，以免搶去BB營養，看她精神不錯，腳骨力特好，行足幾個鐘頭街都未見要休息。入到商場，阿Wing第一時間行到車行，望住門口陳列價值約35萬的七人車「Noah」，佢睇得入神更用手機影低，車行經紀見佢一身名牌似足闊太，即落足嘴頭力Sell，除殷勤招呼上車試坐，又埋枱傾價錢同細節。
之後阿Wing拎住新車資料離開，還邊行邊研究。據知呢款車與黎明得力助手子泉駕駛的七人車同款，阿Wing為方便產後與B外出，亦想把現時駕駛的福士小房車換成七人車，與子泉睇齊。
再睇BB床
其後阿Wing再折返商場逛嬰兒家具店，主攻日本品牌的BB床及被具，見佢細心研究每張床的資料，最後睇中一張可延伸長度及與大人床拼接的BB 床，不過佢未有落訂購買，並向售貨員表示要與家人商量後先決定。
