龔嘉欣操Fit做女殺手哂身材單身28歲怕Punk爆造型趕客

龔嘉欣大變身操Fit做女殺手哂身材

近年Katy發展順利，每年都會喺無綫重頭劇度有份演出。但多年以來，Katy都係行開氣質靚女路線，今次為咗拍戲大變身，又剷青又染哂粉紅色頭髮，難怪Katy自己都難以接受！

飾演殺手嘅KatyPunk友造型十分突破，頭髮剷青、紋身、加上性感背心，真係同以前截然不同！佢就話自己到依家都未敢照鏡，剪頭髮嗰吓以為自己會喊，但最後都只係眼濕濕啫～

Katy更加講到自己都就嚟30歲，現在單身，不過大變身之後就睇怕自己只能再單身一排啦！

Katy喺自己Instagram度上傳造型照，留言話自己呢一刻嘅身份係一個演員，而咁啱今次係一個殺手，仲係第一次做打女，做演員好好玩咁話！小編好欣賞佢咁敬業啊～

由2016年開始，龔嘉欣憑無綫台慶劇《幕後玩家》中「程思汝」一角，演技備受網民讚賞，仲喺《萬千星輝頒獎典禮2016》勇奪「最佳女配角」獎項。今次破格做殺手擴闊戲路，唔知又唔會帶嚟演技上嘅突破呢？

大變身之後，Katy要出席朋友嘅婚禮，就戴上假髮，喺Instagram上傳照片俾粉絲睇。Katy仲留言話「我還是一樣那個我」、「今晚終於有點私人時間，可以做回自己」，睇嚟都仲係有啲接受唔到自己個Punk look啦！

龔嘉欣早前同姚子羚、黃子恆飛咗去馬來西亞拍攝新一輯飲食節目，但唔知係咪太忙冇時間休息，Katy就自爆患上俗稱「生蛇」嘅帶狀疱疹，暫時要停工休養一排，並為影響工作進度而致歉。但話咁快又要開拍新戲，得唔得㗎！

開鏡時，Katy指自己還未痊癒，所以現在都仲係比較易攰，而臀部還留有疤痕！不過都有喺Instagram同大家講唔使擔心，已經好返好多啦！

好彩睇相都冇見到「生蛇」令Katy嘅白滑美腿留疤！其實平日Katy都唔吝嗇分享佢嘅靚相㗎！

Katy話大部分動作戲都會親身上陣，而絕招係專攻男人下體！對手方面就同黎耀祥最多對打戲，可能唔小心踢親佢喎！

唔止靚腿，其實龔嘉欣嘅整體身材都好勻稱！

Katy又透露劇中嘅其他造型會更性感！仲大爆會裝胸作勢升兩Cup，為咗同黎耀祥有親密接觸時，更容易俾佢搵到喎！太謙啦！

其實較早前，Katy喺劇集《誇世代》中飾演尚可欣（Vivian），已經演出過大量色誘場面，仲同森美大跳辣身舞添！

關鍵詞