鼎爺 搞私房菜賺凸 買樓畀女友揸手
廣告
72歲的李家鼎，前年憑無綫節目《阿爺廚房》一炮而紅，粗豪的鼎爺唔止武得，原來仲好煮得。精湛廚藝被埋沒多年，鼎爺食住人氣與拍檔搞「鼎爺私房菜」，由他親自主理，晚晚高朋滿座，預約往往需時數月，有錢都未必可以一嘗鼎爺手勢。
私房菜極速回本，再加上廣告、品牌活動、Talk騷以及各大小商業騷，有說鼎爺半年賺過千萬。早年與前妻施明離婚後，鼎爺在人生低潮遇上現在的女友，二人互相扶持至今關係好到不得了，豬籠入水的鼎爺打算把儲起的錢先當首期，買層近千呎的樓畀女友揸手，咁幾時娶人過門正式做李師奶先?
撰文：東方新地
圖片：新傳媒圖片庫
鼎爺 吸金力強
李家鼎早年入行做龍虎武師，揸住武器打打殺殺大半生，16年拍無綫的《阿爺廚房》，大師傅終於使出真功夫，廚藝了得的他大受歡迎，之後出書、投資私房菜、拍廣告，所有賺錢的機會接踵而來，鼎爺事事親力親為，忙到喘不過氣來，瘋狂吸金的背後代價就是冇時間陪家人。
訂枱排期到5月
據知情者透露:「鼎爺突然爆紅，呢一年佢幾乎日日都係工作，收入幾級跳，依家佢間私房菜一圍最低消費都兩萬幾蚊，唔係個個食得起，不過晚晚都爆場，再加上佢接咗好多廣告代言同商業活動，分分鐘半年都賺過千萬。鼎爺同依家個女友都一齊好多年喇，雖然冇再簽紙結婚，但佢對外都叫女友做李師奶，喺佢人生低潮時，女友鼓勵佢重新振作，又教佢理財，兩家嘅仔女都好接受呢段關係。依家鼎爺紅咗，佢覺得係時候報答女友，所以計劃買層樓畀女友揸手，一齊住當養老屋囉!聽聞已經睇緊樓，有啱心水就會扑槌。」
跟得女友陪開工
鼎爺鐵漢柔情，為了搵錢又唔想忽略女友，不時帶埋女友返將軍澳電視城開工。日前鼎爺開工後與女 友在電視城西餐廳撐枱腳，有傾有講食完又甚有默契各自玩電話，一副老夫老妻模樣。未幾兒子李泳豪出現，原來兩老歎住Tea等埋豪仔，一行三人笑住去停車場攞車返屋企。老竇鼎爺變大紅人，李泳豪除了拍劇、操拳、賽車之餘，原來還要充當鼎爺助手，幫手揸車管接送及睇頭睇尾。有女友幫手理財，又有乖仔泳豪做助手，鼎爺就可以放心去大展鴻圖，向廚神之路繼續邁進。
