黎諾懿幫手改名鍾嘉欣愛女叫梁愛晨

Jan 2 2018

TVB一代女神鍾嘉欣(Linda)16年結婚後，同老公Jeremy Leung努力造人，並於同年誕下女兒Kelly，之後大多數時間留在加拿大，偶爾才回港作商演，而前晚鍾嘉欣返港出席除夕倒數活動，單拖回港的她透露第一年冇陪囡囡Kelly及老公過新年，而佢都幫Kelly改咗中文名叫「梁愛晨」，由於老公中文欠佳所以未有出手改，但就得到好友黎諾懿幫忙提供靈感，而「愛晨」個名有三重意思。問到會否為囡囡添多個弟妹？嘉欣直言有意追多個，但一切隨緣！

撰文：東方新地

圖片：新傳媒圖片庫、鍾嘉欣＠Instagram

鍾嘉欣已為愛女改名

鍾嘉欣專誠返港出席大埔超級城舉行的除夕倒數活動，同粉絲一同迎接新的一年。此行嘉欣單拖回港，未有帶同愛女Kelly和老公同行，嘉欣說今次是第一年一家三口分隔兩地過除夕，所以佢一早已和家人提早慶祝，問到嘉欣幫囡囡改中文名未？佢好開心咁話已為女兒改名，叫「梁愛晨」，當中包含三個意思，包括是愛的戰士，愛晨曦和愛神「Love God」嘅意思，問到老公有冇幫手改名？嘉欣笑說老公中文好差所以冇幫手，但得到好友黎諾懿幫手改名。問到會否為囡囡添多個弟妹？嘉欣直言都希望追多個，但一切隨緣！

帶女拍廣告

鍾嘉欣早前帶囡囡Kelly返港為主題樂園拍攝聖誕特輯，之後已飛返加拿大陪老公、囡囡過聖誕，嘉欣首次以母女檔拍特輯，佢笑言囡囡年紀尚輕，雖然未知係咩一回事，但認為可以為愛女留下美好回憶，嘉欣又說不會安排Kelly做童星，因為希望佢有一個快樂的童年！

囡囡愈大愈似媽咪

嘉欣自當媽媽後，有女萬事足，不時在網上跟粉絲分享女兒Kelly的照片及近況，網民們都大讚可愛，而去年聖誕節，嘉欣更為女兒穿上聖誕裝，貼上兩人的合照，祝大家聖誕快樂，睇真啲！Kelly愈大愈似媽咪，唔使問將來一定係靚女一名！

約李施嬅溫哥華見面

好友李施嬅早前去咗加拿大溫哥華，原來此行佢約咗好友鍾嘉欣見面，兩個靚女齊齊拎住熱飲睇聖誕燈飾。李施嬅將二人合照放上IG，又留言︰「替你開心When I see you, I see happiness, I see love. （替你開心。當我看見你，我就見到快樂和愛。）」

07年《溏心風暴》常在心

《溏心風暴3》依家晚晚熱播，唔少人都話冇咗「常在心」好失色！07年《溏心風暴》係鍾嘉欣首次主演嘅重頭劇集，故事講述一間海味店同一個大家庭，因為兩房人利益衝突而產生嘅一場爭產故事。而鍾嘉欣飾演嘅角色並唔係呢兩房人當中，只係一名律師，同林峯飾演嘅Alfred程亮、陳豪飾演嘅「得得地」唐至安發展感情線，係全劇一大亮點，整個過程令人揪心。

常在心同Alfred經過重重波折，以為最後可以修成正果，點知一場車禍帶走Alfred嘅生命，看著令人痛心。