愛情來了的《美女廚房》！黃翠如公然叫蕭正楠除衫！

原文：對白Cap圖王 ｜ 圖片：TVB節目截圖、Facebook

《美女廚房》蕭正楠黃翠如 放閃光彈唔使錢！

蕭正楠同黃翠如打情罵俏打到上《美女廚房》，眾人梗係要食吓花生、抽吓水啦！點知不敵閃光彈，張振朗淨係企喺一邊都頂唔順，開口講笑話自己都係出返去先啦！

其中一幕，廚房門一打開，黃翠如攞住菜刀質問眾人：「你哋邊一個踩我！」，吳卓羲立即指向蕭正楠：「佢（蕭正楠）話身材好過你。」

黃翠如即刻回應：「除衫！睇你係咪好過我！」，點知，抵死嘅蕭正楠神回：「你知㗎！」真係閃到冇人有啊！！！

完美男友蕭正楠

讚還讚，成集蕭正楠讚黃翠如冇停過口，連女友切幾片薑都讚！

梗係搞到全場嘩然！

阿BOB忍唔住窒吓蕭正楠，叫佢諗吓有無嘢可以批評到黃翠如！蕭正楠即刻表示：「我見到完美！」

想做100分男友嘅命運係咁㗎喇！

深情對望

黃翠如喺第一輪嘅菜式獲得除咗蕭正楠以外嘅人嘅一致負評，但阿蕭喺翠如深情嘅目光下，竟然講得出：「其實好甜！」然後再Chok爆回望翠如，真係唔使加Effect到感覺到佢哋有幾Sweet啦！

愛情來了的《美女廚房》

試食咗少少，蕭正楠Man咁爆咗一句：「無人欣賞你，我欣賞你。」再嗱嗱塞哂翠如煮嘅餸落口，哇，真係感動全場！

蕭正楠真情流露黃翠如眼泛淚光

能夠搵到個願意煮飯俾自己食嘅女人，係幾咁幸福！難怪全場都係咁起哄叫佢哋快啲注冊結婚！

聽到對方幾句簡單讚美，都足以感動落淚！

「結婚！結婚！結婚！」

相信唔少粉絲都非常希望佢兩個快啲「有情人終成眷屬」，唔知幾時會聽到佢哋嘅好消息呢？

延伸閱讀：5對TVB 熒幕情侶

1.黃翠如 蕭正楠 －《師奶MADAM》

黃翠如同蕭正楠現正打得火熱！實翠如BB同Edwin 自2014年五月公開戀情後，兩人戀情一直十分高調，有如糖痴豆。不論鏡頭前後都可現二人甜蜜蹤影！其實佢哋嘅戀情萌芽於拍攝《師奶MADAM》之時！翠如喺「定情劇」中飾演由千金小姐變做屋邨師奶的女卧底，而蕭正楠就飾演翠如嘅兒時夢中情人，與翠如扮演夫妻，一同查案。劇中二人有情人終成眷屬，由假夫妻變成真夫妻，而喺現實生活中，Edwin都一樣係翠如BB嘅Mr. Right！個個都Like爆佢哋，二人仲多次一齊奪得熒幕情侶獎添！

當然唔少得佢哋喺《幕後玩家》入面嘅濕身出浴激嘴戲份！

2.胡杏兒 黄宗澤 － 《我的野蠻奶奶》

相信大家仲記得杏兒喺拎視后嘅時候向Bosco講嘅愛的宣言，杏兒當時話：「我知道我好多缺點，我都好難頂，但你都好多缺點，你都好難頂，我希望……我哋一路頂住大家。」

其實佢哋喺2005年拍攝古裝劇《我的野蠻奶奶》時撻着。杏兒喺劇中同Bosco飾演夫妻，與野蠻奶奶汪明荃鬧出唔少婆媳糾紛嘅趣事。喺現實生活中，Bosco同杏兒呢對姐弟戀長達八年，喺圈中公認為金童玉女。可惜，佢哋最終都冇繼續「頂住」，喺2012年以分手收場。

同Bosco分手三年之後，杏兒終於遇到佢嘅真愛。佢喺2015年正式宣布同金融才俊李乘德（Phil）拍拖，而Phil亦喺同年杏兒生日當日求婚成功。

3.鄭嘉穎 周麗淇－《翡翠戀曲》

要數鄭嘉穎和周麗淇嘅經典作必定諗起《天幕下的戀人》，但其實佢地喺2004年《翡翠戀曲》一劇已經首度合作。其後先誕生《天幕下的戀人》同佢嘅姊妹作《最美麗的第七天》。三套劇入面兩人都係飾演情侶，難怪佢哋拍出真愛！雖然佢哋並冇公開戀情，直至分手後先正式承認五年地下情，但係二人戀情一直係公開嘅秘密。

而嘉穎同陳凱琳嘅「父女戀」同樣係萌芽於拍劇！二人於2015年拍攝劇集《殭》而認識，同年承認拍拖。

4.馬國明 胡定欣 －《舞動奇跡》

馬國明好戲、靚仔之餘，幾乎零緋聞，確實係圈中既「筍盤」之一。原來多年前「筍盤」都曾經俾胡定欣「封盤」。事緣兩人喺2008年拍攝舞蹈真人Show《舞動奇跡》中跳出真愛，可惜拍拖不足一年以分手收場。分手後，定欣指同馬明因為基礎唔穩定，而且太多顧忌而分手。

同定欣分手後，馬明一直未有着落，但早前馬明與黃心穎傳出緋聞，經常被影到撐枱腳同約睇戲，又不時情侶檔出席活動。近日馬明公開表示唔介意大家叫黃心穎係佢女朋友，明顯想公開戀情！

而定欣嘅感情路崎嶇，雖然之前同陳展鵬傳出緋聞，仲以情侶檔出騷，點知最後殺出個程咬金，展鵬暗撻港姐單文柔，而近日定欣被指秘戀新人施駿喆，但定欣否認並稱對方只係小粉絲。

5. 陳豪 陳茵媺－《心戰》

睇咗咁耐，好似每對TVB熒幕情侶都逃唔過分手收場⋯⋯其實又唔係嘅！陳豪同陳茵媺喺2010年拍《心戰》一劇認識。雖然佢地唔係飾演情侶而係兄妹，但都一樣可以擦出愛火花！兩人喺2010年相戀，拍拖兩年多後在巴黎結婚，短短四年就頻頻「造人」，至今已經生左兩仔一女，簡直就係TVB嘅模範家庭！