C君太太「港台之花」黃天頤告別港台節目《Gimme 5》 進入倒數階段
文：東方新地 圖：黃天頤IG
節目進入倒數階段 黃天頤在自己社交平台分享心情感受
節目《Gimme 5》逢星期一至五黃昏5時至7時在港台播出，節目有多元化話題，由07年至今推出了13年，其間換過不少主持人，只有黃天頤是五代主持人，不過日前黃天頤在社交平台發文宣布即將告別港台《Gimme 5》，她感言：「分手嘅說話，點講都好似唔能夠完美。今日節目中用咗爛分手作引旨，正式宣佈《Gimme 5》倒數兩星期就會完成佢嘅歷史任務。」
談及離開原因「我比任何一個人都不捨」
至於為何會離開，黃天頤則有暗示：「作為一個經歷五代嘅主持人，我比任何一個人都不捨，亦都曾經爭取過呢個組合可否原封不動。可惜，阿公有更重要嘅任務要交俾唔同嘅主持人。」指拍檔丘國盛、方梓豪及她自己將會有新挑戰，字裡行間依依不捨。
結婚就快一周年C君自爆「受黃子華感召決定結婚」
農夫成員鄭詩君（C君）同拍拖五年嘅DJ女友黃天頤於去年12月拉埋天窗，出名人緣好嘅C君出動星級兄弟團包括拍檔陸永、蕭正楠、黃翠如夫婦、洪永城等接新娘，而唐詩詠則客串出任大妗姐。C君喺接新娘時發表「愛的誓言」，更大大聲立誓：「做唔到就天打雷劈！」
陸永：二人最襯係身高
一對新人當時於四季酒店筵開21席宴請親朋，現場布置有龍鳳刺繡，C君更邀得日本書法家題「幸運」二字作佈景板。圈中唔少紅星好友包括：黃子華、鄭裕玲、容祖兒、蔡卓妍、 謝安琪、張繼聰等均有到賀，當中喜宴稀客子華同Do姐更被安排坐埋 一齊，旋成為集郵對象全晚影唔停！期間一對新人聯同兄弟團現身受訪，陸永爆料：「佢哋真係襯，特別係身高，佢哋識咗20幾年，C君好細個就暗戀佢。」
C君自爆受子華感召結婚
C君鬼馬話係明戀：「單戀咗十幾年終於可以拍拖唔通諗分手咩，梗想開花結果。黃子華曾經喺棟篤笑中講過搵到好相處嘅伴侶，諗到佢係唔會為你帶來唔開心，咁有智慧嘅人都咁講梗係要結婚。」C君話佢個「愛的誓言」，亦係參考黃子華棟篤笑嘅內容而寫！至於老婆黃天頤就話兩個人相處間中亦有嗌交，反而今次籌備婚禮時就完全冇，好神奇！兩公婆打算先休息幾日抖下，下年先至去度蜜月喎。
