唔止《森美旅行團》！細數麥美恩同森美歷年爆笑「冤」源！
森美做港姐主持 麥美恩被封「龍躉村姑」
其實森美同麥美恩嘅「冤」源由Mayanne喺2011年參選港姐時開始！早年嘅Mayanne身材比較圓潤，所以就被傳媒封為「龍躉村姑」，但加拿大返嚟嘅竹昇妹麥美恩一開始誤解咗「村姑」係類似鄰家女孩嘅意思，以為係好嘢！而當年就咁啱係由森美做港姐主持人喇！
森美對「梗頸四」麥美恩冇印象！
但隔幾年，麥美恩再上返森美嘅電台節目《公子會》，森美竟然大爆自己其實對當年麥美恩呢個「梗頸四」一啲印象都冇！講返起「龍躉村姑」呢個稱號，森美仲笑到企咗起身！不過喺呢個2015年嘅節目入面，佢哋睇落已經熟咗好多。
想當年麥美恩因為相較其他佳麗豐滿的身材，被傳媒封為「龍躉村姑」……
麥美恩回流香港後參加2011年的香港小姐競選，最終奪得第四名。當年冠軍係出爐最「最佳女配角」朱晨麗，亞軍朱希敏、季軍許亦妮。
一齊主持《學是學非放暑假》
麥美恩喺2013年成為綜藝節目《學是學非》的主持之一，經常有爆笑演出，真摯不造作的感覺相當親民，「傻大姐」形象深入民心！而森美就加入咗2014年嘅特別版《學是學非放暑假》擔任隊長。
森美平時串得人多，但喺節目入面就成日俾班是非精玩返轉頭，唔少觀眾都話睇得好過癮！
麥美恩仲玩到成枝水兜頭淋落森美度！成班是非精都笑得勁開心！
除咗森美同麥美恩，主持人仲有馮盈盈、張寶兒、劉穎鏇、梁嘉琪、湯洛雯等是非精。
2016年港姐決賽 森美麥美恩鬥嘴傳鬧不和
喺2016年《香港小姐競選決賽》當晚，森美同麥美恩都係台下星級評判團之一。當時Do姐鄭裕玲就問森美覺得咩人適合做無綫50週年台慶嘅女司儀，森美就搞笑話麥美恩太牙尖嘴利，完全唔得，仲話嚟緊50年嘅台慶都唔想再見到佢！
當時仲因為咁所以鬧出不和傳聞，不過就依家睇返真係得啖笑！
咁啱嘅係！依家嘅《森美旅行團2》主持之一，丁子朗，當年都有以候選香港先生嘅身份出席2016年《香港小姐競選決賽》，過下場咁，好有緣份啊！
「雙美」拍檔多次合作做司儀
雖然兩人好似撈亂骨頭咁，但合作起嚟咁有火花，當然受觀眾歡迎！所以幾年嚟都不時會一齊做唔少大小活動嘅司儀，更包括2017年《香港小姐競選決賽》呢啲無綫盛事！
麥美恩「胸壓」森美
麥美恩仲試過喺2015年無綫台慶「胸壓」森美，簡直Friend過打Band！不過呢位竹昇妹就嚇到人夫森美眼都凸埋出嚟啦！
《森美旅行團》
但令呢對拍檔人氣更上一層嘅節目，當然係2017年開始嘅《森美旅行團》啦！第一輯《森美旅行團》以東京作目的地，除咗森美叔叔，主持人還有麥美恩、高Ling高海寧及心穎BB黃心穎。
但估唔到第二輯就冇咗心穎BB同高Ling！不過呢對「雙美」拍檔就繼續撐住！
《森美旅行團2》直飛關西，主打介紹京都以及近郊景點，主持班底就只有麥美恩可以留低，拍檔換了吳若希及丁子朗。
麥美恩嘅主持風格自然唔造作，成日被人寸都唔會黑面，為咗節目效果，仲不時都會扮醜博觀眾一笑！
森美扮舞伎嚇親人
勢估唔到森美叔叔都會打扮到咁出嚟嚇人⋯⋯仲要同麥美恩一組去搵路人合照！難怪人哋走都走唔切！
麥美恩「螢幕初浸」益咗森美叔叔！
喺《森美旅行團2》，麥美恩就自爆入行咁多年都有個遺憾係從未試過獻出「螢幕初浸」！今次終於有機會啦！
不過森美叔就串爆麥美恩，話一個女仔入行咁多年都未被導演叫過去浸溫泉，即係個女仔有問題啦！
大家覺得森美浸溫泉正啲，定係Mayanne嘅「螢幕初浸」有睇頭啲呢？
有片睇！
