馮盈盈藐爆王卓淇 拍劇炫富
廣告
無綫新劇《果欄中的江湖大嫂》話題多多，除咗省鏡岑麗香、美魔女陳煒，同第一次拍劇已經大家姐上身令人眼前一亮的馮盈盈，仲有經常比堅尼上陣的長腿姐姐王卓淇。
戲內同惡人阿媽甄詠珊相依為命要捱窮，現實中王卓淇家底豐厚、一個手袋已經係無綫姐仔幾個月人工，盛傳拍劇愛炫富、開工有幾個跟班，三線大茄排場架勢似大小姐，有指被同劇對手戲最多的馮盈盈藐爆，不過，馮盈盈就解畫話同王卓淇相處融洽，但就漏口風爆：「佢係試過帶阿媽工人開工！」
馮盈盈幫晒口
14年港姐亞軍王卓淇出道至今是非停不了，當年選港姐已經有傳有富媽媽撐腰、表面係碩士高材生其實被爆英國就學期間拍拖識男仔至係正職；正式拍劇即自稱吳業坤正室鬧爆小三龔嘉欣，最近新作《果欄中的江湖大嫂》出街，唔單止三點式任睇勁搶鏡，而且傳聞多多，有指有人入廠開工周身名牌靚車出入，因為身家豐厚更自視貴族避與其他平民小花多來往，所以入行四年電視台朋友冇乜幾個，新劇除咗劇中阿媽甄詠珊，跟同輩演員一概冇偈傾。
一向敢言大情大性，新劇演出大家姐又入型入格，有指馮盈盈就對炫富王卓淇睇唔過眼。馮盈盈接受本刊訪問時就幫王卓淇澄清：「劇入面佢喺我酒吧打工，我哋好多對手戲，講真嗰句，我係第一次拍劇，王卓淇已經有幾年經驗，成日提我入廠帶多件衫、我唔得閒又會幫我買嘢食，份人其實好nice。大家都係同輩演員，真係關係幾好，有約出嚟食飯。」
換幾套bikini又要帶狗
聽講佢開工都帶埋幾個助手？馮盈盈話：「我諗我要幫佢澄清，有場戲真係佢媽咪帶埋工人嚟探班又幫手，啲人唔知情可能會誤會，但係我哋女仔開工已經好多嘢拎，佢嗰日要換幾套bikini又要帶埋隻狗，真係踢晒腳。我覺得呢個情況之下，媽咪嚟幫吓手唔算過分嘅！」
