撰文：東方新地 ｜ 圖片：新傳媒資料庫、YouTube、微博

電台靈異事件簿：

淒厲叫聲嚇窒森美

森美曾在深夜節目《架勢堂》中撞鬼，直播期間有聽眾致電大談撞鬼經歷，突然電話中傳出女鬼淒厲尖叫，嚇到一向轉數快嘅森美騰晒雞，事件擾攘近兩分鐘，森美突然播歌避開話題。

當歌曲播完，森美率先開聲道歉說：「有怪莫怪，細路仔唔識世界，今次真係有排驚。」

女鬼送客

「多年前有兩個電台DJ喺凌晨時份收工時搭電梯，商台到夜晚10點就會鎖前門電梯，所以佢哋搭後門電梯離開，當時佢哋由3樓搭落地下，而其中一人無意間向上望時，發現電梯槽抽氣扇位有個女人頭俯視住佢哋，個DJ直頭嚇到唔敢出聲，又唔敢同隔籬嗰個講⋯⋯」

隔咗幾秒鐘，佢又再向上望，發現個女人依然喺度望實，真係嚇到死咁滯，架電梯一到地下佢即刻拉埋另一個DJ急急腳走，直至離開商台至敢講出嚟。」

半身人凌空飄移

好多年前，商台啲夜更司機都會貪方便喺公司後欄開張帆布床瞓，有次有個男DJ半夜時想搵茶水阿姐，於是走埋去問個司機知唔知阿姐去咗邊，問咗兩句個司機都無理佢。

於是佢用手拍個司機膊頭，拍咗兩吓個司機終於有反應，不過依然係用背脊對住佢，無出聲咁企咗起身，個男DJ嗰刻先發現個司機只得上半身，下半身係凌空飛起飄移，當堂嚇到拔腿就跑，事後病足成個星期！

潘紹聰見鬼

曾主持《恐怖熱線》嘅潘紹聰，笑言多年來都聽過唔少鬼故，自己亦親身經歷過：「記得有次主持節目，從控制台玻璃倒影見到有個黑影喺我背後閃過，當時自己都嚇咗一跳，因為好少會on air時有人走入嚟，轉頭一望發現根本冇人，個心即時寒一寒。」

但當時個聽眾仲講緊鬼故，所以當時我都強裝鎮定，呢個時候突然無端端有把女聲『呀』尖叫咗一聲，事後我再聽番段聲帶都一樣聽到！」

港台有鬼車

某港台前女DJ爆料，該台其實都好猛，最經典莫過於夜班看更所見所聞。「一到夜晚，港台都會閂閘，職員每次出入都要由夜班看更開閘，有晚個看更聽到從遠處傳嚟幾聲撻匙聲，知道會有車駛出，所以就起身準備開閘，點知一行出更亭，就見到部黃色嘅私家車穿過閘門而出，但閘門冇爛，嚇到個看更即時辭工！」

禁播鬼歌〈夜夜癡纏〉

麥潔文除了於電影《靈氣迫人》演女鬼，更主唱主題曲〈夜夜癡纏〉，據說係全港電台嘅禁播歌！因為每次深夜播放時，都會發生極度恐怖嘅靈異事件！

有傳因該曲開始時，麥潔文哼出「嗚嗚聲」，特別容易招惹靈體，而有DJ曾試過深宵播放時，發現黑影閃過，聽眾聽了後又被鬼壓。

最恐怖一次係播放時有另一把淒厲女聲，悲鳴咁邊喊邊哼歌，電台人員之後重聽該把女聲仍在，嘩，真係令人不寒而慄！