【深宮計】死得人多！曾偉權被斬頭 陳煒下場仲慘⋯⋯
咁都未夠，原來飾演駙馬「武攸暨」嘅曾偉權，仲有「太平公主」陳煒都難逃一死！
撰文：東方新地圖片：TVB截圖、新傳媒圖片、YouTube截圖
陳煒下場係⋯
無綫重頭劇《宮心計2之深宮計》以唐朝為背景，故事從唐玄宗（馬浚偉飾）平定韋后（米雪飾）之亂開始，涵蓋「唐隆之變」及「先天之變」兩個唐朝歷史事件。
陳煒 掌摑三司
陳煒同馬浚偉爭權位鬥過你死我活，陳煒對胡定欣仲毫不客氣想摑佢，據知煒哥之後仲會掌摑張慧儀、羅霖、康華呢三司㖭！
「太平公主」野心好大，對住阿哥「李旦」李龍基好會演戲，但又暗中指使司膳在李隆基飲食下毒⋯⋯
喺無綫嘅超長預告片中，曾偉權會被押去刑場斬頭，陳煒想趕去刑場，可惜嚟唔切⋯⋯
陳煒在靈堂上話一定要為死去嘅駙馬報仇⋯⋯
陳煒起兵奪權，但最終被馬浚偉、馬國明、蕭正楠先發制人控制大局！
歷史上 太平公主被賜死
從無綫的預告片所見，煒哥吐血死，應該係被賜毒酒⋯⋯
睇番歷史，太平公主見黨羽被誅殺殆盡，不得不逃入佛寺，三日後返回。上皇李旦出面請玄宗恕其死罪，被玄宗拒絕，太平公主最終被賜死家中，其夫武攸暨墳墓也被剷平。
其實睇番煒哥自亞視執笠後，喺無綫劇拍過唔少劇集都好收得，而且網友對佢評價好高，又大讚佢保養得宜超級索！
喺《果欄中的江湖大嫂》有成班女演員包括岑麗香、馮盈盈和江嘉敏等，當大家以為上述年輕貌美的小花會成為焦點時，其實44歲女主角「煒哥」陳煒先至係贏盡掌聲嗰個！陳煒在劇中飾演一個過氣的功利小女星，但是在慶生時發現老公外遇，之後回到香港生活，更成為了一個果欄的欄主。
煒哥2008年同台灣商人顏志行結婚，早年煒哥更跟老公移居泰國、台灣時，不時公開曬恩愛。但呢啲恩愛畫面都已經成過去⋯⋯
因為陳煒承認早在復出拍劇時，經已與老公離婚，直到依家已經離婚6年。不過煒哥就話只係兩人感情出現問題，與第三者無關。
其實單身又有咩好驚呢？44歲煒哥keep得咁好，人靚身材正，唔愁冇第二春啦！
