陳瀅整蠱同事自揭惡行 JW陳曉華嚇到花容失色 被指壓力太大封「貪玩女神」
廣告
早前被邵氏兄弟列入「9位焦點藝人」的陳瀅,劇接劇應該好忙,不過忙裡偷閒仲有時間周圍整蠱同事,更拍成短片放上網同大家分享,片中見她走勻將軍澳電視城,四出搵目標惡搞,除了好姊妹劉佩玥、JW王灝兒及陳曉華等中招外,就連男同事同後輩都唔放過,已經33歲的陳瀅大唔透仲係好貪玩!
陳瀅公開惡搞片自稱好忙
備受無綫力捧的陳瀅 (Jeannie) 正在拍攝新劇《痞子無間道》,身為女主角之一的她戲份咁重,日接夜夜接日開工,仲有時間可以四出焫火頭整蠱人,更搵人拍下當時情況並剪輯成短片,上載社交網娛樂大家,並留言:「I’ve been very busy (我好忙)。」
![陳瀅 陳瀅惡搞JW王灝兒,傾傾吓偈指住地下大叫及跑走。](https://imgs.orientalsunday.hk/wp-content/uploads/2023/05/1_708392950645ca1be8dc13-811x1024.jpg)
好姊妹全部中招
從陳瀅放上社交網的惡搞片中可見,她整蠱的人為數不少,涉及多位好姊妹及圈中好友,包括朱敏瀚、JW王灝兒、Chantel姚焯菲、劉佩玥、陳山聰、賴慰玲、周嘉洛及張馳豪,因為所有人都對她毫無戒心,令她更易得逞。
![陳瀅 陳瀅與陳山聰、劉佩玥在路邊本來傾得好地地。](https://imgs.orientalsunday.hk/wp-content/uploads/2023/05/8_1219098645ca3e47b6b1-626x1024.jpg)
JW反應最激最好笑
陳瀅的整蠱招數不外乎行近與對手傾偈,突然指向一處扮驚慌失控大叫兼且跑開,對方唔知發生咩事但好自然會驚埋一份,陳瀅的整蠱行動都好成功,當中反應最大的就是JW,其次是陳曉華與劉佩玥,三人都被嚇得花容失色,JW驚到鼻哥窿都冇肉,個樣真係好鬼好笑,陳瀅在現場更趴埋牆笑到喊。
![陳瀅 陳瀅呢次目標係陳曉華。](https://imgs.orientalsunday.hk/wp-content/uploads/2023/05/10_1728402370645ca3e908db0-629x1024.jpg)
Chantel淡定應對 Aska零反應
至於最淡定肯定是同樣來自《聲夢傳奇》的Chantel姚卓菲與Aska張馳豪,雖然陳瀅指住Chantel個身七情上面大叫,但Chantel只係跳咗一下,然後望一望自己就冷靜下來,16歲小妹妹原來可以好大膽,至於Aska就對陳瀅的惡搞完全冇反應。
![陳瀅 陳瀅突襲Chantel,雖然表情好誇張,但Chantel都只係嚇一嚇。](https://imgs.orientalsunday.hk/wp-content/uploads/2023/05/6_1478108175645ca57414058-688x1024.jpg)
好友留言話太曳 葉念琛指壓力太大
陳瀅條惡搞片引來一眾圈中好友及網民留言,張繼聰與陳茵媺都話佢「Nauhty(頑皮)」,葉念琛就話佢工作壓力好大,更有網民問佢係咪拍劇拍到傻咗?
![陳瀅 陳瀅玩到去服裝間,目標係朱敏瀚。](https://imgs.orientalsunday.hk/wp-content/uploads/2023/05/12_1395373519645caa04dfd5d-634x1024.jpg)
撰文:東方新地圖片來源:IG@missjni