陳敏之做飲食節目劣評如潮網民大彈其表現不專業！

陳敏之做飲食節目劣評如潮

最近，TVB星期一至五晚播出陳敏之與區永權(Albert)為無綫主持的最新旅遊飲食節目《到此一遊台北》，節目中，二人帶觀眾食盡台灣地道美食兼玩轉新景點。本應二人合作做飲食主持應為觀眾帶來新鮮感，可惜節目出街後，不單收視一般，仲引來觀眾敏之於節目中的表現！

惹來劣評的原因是網民唔太鍾意敏之做飲食主持的作風，例如有一集，二人試食全台灣最臭的臭豆腐，但敏之一聞到臭豆腐味時，馬上面色一沉！

作為一個飲食主持，試食物就必定係指定動作，但敏之就堅拒食臭豆腐，指臭豆腐真係好臭外，仲不斷強調自己好想嘔！

敏之皺哂眉同Albert講自己真係接受唔到食臭豆腐，平心而論，雖然食臭豆腐的確唔係個個都接受到，但有網友嫌敏之有欠做飲食主持咩都要放入口試食嘅專業。

堅拒將臭豆腐放入口嘅敏之仲喺鏡頭前表示自己好想嘔，而拍擋Albert見對方面對臭豆腐咁辛苦，唯有自己一個人在鏡頭面前試食介紹。

點知當Albert食緊第一口臭豆腐想講出食後感時，敏之即刻就同對方講：「講嘢唔好對住我！」唔知當下Albert聽到呢句有咩感覺呢？

唔洗食嘅敏之講完後，面色依然好難看，仲要個身側開Albert，好似想有咁遠避咁遠，真係睇得出佢幾唔鍾意臭豆腐同食臭豆腐啲人！

敏之其後於個人社交網上載節目片段兼留言︰「真係睇番都聞到臭。」

話說，敏之面對自己唔鍾意食嘅食物時，表現出討厭兼嫌棄嘅表情都唔係第一次。例如第六集介紹酸菜白肉鍋時，敏之對餐桌上散發的濃濃酸菜味，就馬上變樣。

另外，亦有一次二人評點台北三大牛肉麵時，敏之知道枱上有牛睪丸後，大叫作嘔，仲話死都唔會吃…結果就梗係區永權自己再一次好無奈兼無癮咁自己一個人吃。

節目中，不時都會見到Albert自己一個人密密食，而敏之就喺旁邊望住對方邊食花生。

敏之喺節目中嘅表現，惹來網民狂鬧，有網友指節目組應搵《學事學非》、《3日2夜》嘅年輕人做主持或會仲好看，亦有網友認為作為主持咩都唔食因怕肥，又經常嫌棄試食，表現唔專業，仲為Albert有敏之呢個拍擋感到辛苦。

其實敏之就唔係第一次做主持，最近亦成為《流行經典50年》主持之一，不過可能日後要諗諗自己啱唔啱做飲食節目主持。

關鍵詞