阿女拍拖一年趕嫁 黃日華 肉赤落閘
阿女拍拖一年趕嫁 黃日華 肉赤落閘
27歲的黃芷晴同曾從事酒店業的Jimmy Fung拍拖年多，二人早於芷晴讀大學時認識，直至年多前偶然撞番，兩人極速譜出戀曲，拍拖半年已經有結婚計劃！黃芷晴替雜誌拍婚紗照時，更恨嫁恨到出口表示，原本想搵男友一齊拍，但又怕太主動所以打消念頭！
先斬後奏 籌備婚禮
據知近日男方一班親友，已經收到Jimmy同黃芷晴結婚消息，二人已著手籌備婚禮，黃芷晴亦開始搵人設計婚紗。為免阿爸反對，實行先斬後奏！據知情者透露：「其實同Jimmy拍拖無耐，芷晴已經好想結婚，佢仲諗埋結婚之後會生一個小朋友，又打算租屋同老公搬出去住，華哥好緊張個女，梗係想佢揀個啱先啦！但芷晴就單方面有晒planning！」
黃日華：我未睇到個男仔嘅優缺點
出名係絕種好男人的黃日華，當然想個女搵個一樣有膊頭有承擔嘅男人照顧，不過這個未來女婿似乎未達標，Jimmy本身成個大細路咁，事事要女友照顧，之前芷晴就透露男友連「小強」都怕，要佢保護番轉頭！芷晴密友透露「咪睇芷晴外表柔弱，對住男友好有主見，仲會保護對方。今年二月底一家人去泰國旅行，芷晴都預埋男友，等佢可以同阿爸溝通多啲！不過全個旅程，佢哋都冇乜兩句！」早前黃日華接受訪問時，提到女兒想嫁要先過佢嗰關，佢就話：「個女大個自己決定，不過佢哋拍咗好短時間啫，我未睇到個男仔嘅優缺點。」即係根本未過華哥嗰關。
發明星夢
唔識保護女友已經係男人大忌，而曾做酒店行業的Jimmy，見女友在娛樂圈工作五光十色，竟然有意放棄現時工作， 想入行做明星，事業無成仲大發明星夢，令錫女錫到燶的黃日華氣上心頭！為助男友爭取機會，黃芷晴拍乜都引薦男友，上年二人一齊拍手錶廣告，亦是芷晴向廣告商提議情侶檔演出，才令Jimmy成功踏出第一步，近日又經常帶男友出席公開活動，幫到出晒面。
就晒男友
一向乖乖女的黃芷晴，每次拍拖都非常投入，今次對住同樣有早婚念頭的Jimmy，兩個就相當啱Key。大學修讀設計系的芷晴，試過出自家品牌「Oh My Deer」，不時自己做手工設計氹爹哋媽咪，但自從同Jimmy拍拖後，就乜都男友第一！
之前Jimmy姪女生日，芷晴更為對方設計生日蛋糕兼幫手整嘢食慶祝。就連今年食團年飯，佢亦先就男友時間， 阿爸都只係副選。
新加坡預支蜜月
而今年五月，同男友去新加坡過生日兼慶祝拍拖一周年，黃芷晴開心大晒fit爆泳裝照，而這輯泳裝照相信由Jimmy操刀！
