金像獎的背後 五個從未奪影帝的男神
自從喺《尋秦記》彈起後，古天樂將重心轉移到電影市場，拍過多套膾炙人口的好戲，但就無一套成功攞獎，可以話係「戥腳鐵膽」！多年來，古仔喺所有電影頒獎禮的提名共有17個，可惜全無收獲。而金像獎方面，古仔2009年憑《一個好爸爸》、及2014年憑《掃毒》獲提名過最佳男主角。
歌神張學友，除咗歌唱勁之外，拍戲都有一手，早喺1989年同1990年分別於金像獎同金馬獎都攞過最佳男配角，1989年便憑《旺角卡門》中「烏蠅」一角獲金像獎最佳男配角，為「四大天王」中最早喺金像獎留名嘅人。另外1990年就憑《笑傲江湖》中「歐陽全」一角，獲金馬獎最佳男配角。
可惜學友冇咩影帝命，佢先後憑《暗色天堂》、《月滿軒尼詩》及《金雞2》等電影、六次獲提名金像獎最佳男主角，不過全部落空。學友近幾年都已經唔係經常拍電影，就算拍都唔係經常做男一，唔知佢將來仲有冇機會一嚐影帝滋味呢？
今年憑《脫皮爸爸》提名最佳男主角的吳鎮宇，除咗揸飛機叻之外，亦係公認的好戲之人，多年來已獲四次提名金像獎最佳男主角。可惜鎮宇每一次都鍛羽而歸，未捧走過金像女神。成功上台的一次，係2000年憑《公元2000》奪最佳男配角。
「金句王」黎明今年負責頒影帝狀座俾林家棟，其實佢除咗叱咤樂壇，仲曾分別喺1997年、1999年及2003年獲提名金像獎最佳男主角，可惜三次都飲恨而回。反而係金馬獎就有所斬獲，喺2002年憑《三更之回家》中「于輝」獲金馬獎最佳男主角。
歌影視三棲的小齊任賢齊可謂全能藝人，多年除咗帶俾大家唔少金曲，原來亦拍咗40多部電影！以前有《夏日的麼麼茶》、《嫁個有錢人》等輕鬆小品，到近年《樹大招風》、《奪命金》等嚴肅的角色，期間同過無數影帝影后交手，不過小齊竟然從未喺金像獎有過任何提名。
直至今年，小齊終憑《樹大招風》首次獲提名最佳男主角，雖然最終被同片的林家棟奪得影帝，但能獲提名都係一種好大的肯定，希望小齊再接再厲！
