掃狐掃唔停 莊思明心淡返娘家
撰文：東方新地 圖片：新傳媒圖片、Instagram
莊思明 掃狐掃唔停
人人開心迎豬年，偏偏莊思明就揀正年廿九在社交網發文開火，鬧爆小 三：「唔明點解啲再造人可以成日咁唔要面，纏著人哋男朋友！」仲要Hashtag「好 彩我男友好錫我咩都同我講」、「專一嘅男人好難搵」，句句有骨落地，雖然事後莊 思明解畫話係幫朋友發聲，不過，鬧得咁傳神，似乎針唔拮到肉真係冇可能咁上火。
公開鬧完小三，莊思明今個農曆年更同男友楊明分開過，校啱時間同家姐莊 思敏飛返大馬娘家，即使楊明年初一在個人IG Po出二人早前自拍的咀相公開氹 番女友，莊思明都冇表示。據知情者透露：「楊明好有女人緣，成日把口𠺘過 油，氹到啲女鬼死咁開心，一直以嚟都好多女喺身邊車輪轉，呢排Lisa（莊思明） 感覺到男友身邊又有風吹草動， 收到風先會咁嬲，咪忍唔住開火囉！Jacquelin（莊 思敏）怕個妹畀人蝦，都開晒聲叫個妹諗清楚！呢個人係咪嫁得過！」
飛甩男友 返娘家
莊思明成日話父母好鍾意楊明呢位準女婿，不過，返大馬同家人團年嘅大時 節，竟然冇男友份！
為飛來蜢嘈交
出名戀愛大過天，向來係順得女友的莊思明，同楊明16年拍《愛•回家》撻 著，拍拖以來，乜都以男友為中心：「Lisa拍親拖都好投入，同楊明一齊之後，佢 完全冇晒主見，乜都畀男友話晒事，又對男友服侍周到，以前佢唔使做家頭細務，但為咗照顧楊明，專登去學烹飪，絕對係一個廿四孝女友，之不過最慘係咁 耐以嚟，楊明身邊成日有飛來蜢出現，每次嘈交都係因為啲飛來蜢，但每次楊明 一氹佢，佢就心軟乜都信晒男友。不過咁，佢身邊啲姊妹同家姐莊思敏都開始睇唔過眼，亦覺得楊明處理得唔太好，所以成日會提住個妹，唔好睇得感情咁重，Jacquelin今次陪細妹返大馬，Lisa亦想趁機冷靜吓，諗清楚之後條路點行！」
姊妹獻計
發火鬧爆小三後，莊思明撇甩男友同家姐莊思敏及 細妹莊思華，飛返馬來西亞娘家過年，姊妹齊獻計 叫莊思明冷靜諗清楚，擺明唔想個妹嫁錯人！
同公司收風易
16年約滿TVB，莊思明一度想離巢外闖，但最終因為同楊明拍拖想近水 樓台而續約留低。據知情者透露：「楊明嗰時開始被捧，話晒同一間公司做 嘢，會容易啲就時間見面，周不時去探班收風又易啲，加上佢家姐Jacquelin 交遊廣闊識人多自然有唔少線眼，有飛來蜢想死黐楊明Jacquelin都會收到 風，提醒個妹。不過姊妹聯手，都係無減飛來蜢！」
早年拍攝《誰家灶頭無煙火》已經同楊明傳出緋聞的龔嘉欣，16年就有指 她專登改機票，跟楊明同機飛英國出席陳智燊宋熙年婚禮，在機場受訪時還意氣風發表示：「我哋係飛馬來西亞咋！唔係度蜜月，大家唔好亂寫！」連楊明都表現尷尬，話唔明佢點解咁講，明明飛英國唔係馬來西亞，龔嘉欣亦因 此辣著同楊明剛拍拖的莊思明，爆seed鬧爆龔直指：「楊明只會和我度蜜 月！」以宣示主權。
約埋食煙
16年約滿一度有意離巢無綫的莊思明，最終都係續約留低，有指她是希望能同男友楊明同公司工作拉近距離，收風都易啲！早前兩人就分別在電視城開工，趁機攝幾分鐘時間，在電視城三廠外食支煙見個面！
零交流
兩人各自各食煙，冇乜兩句！
對食冇偈傾
近水樓台果然奏效，早前，楊明、莊思明同時在電視城開工，就算一個 東一個西並不同場，都專登攝幾分鐘時間偷閒見面齊齊啜番口煙，不過，食煙全程兩人近乎零交流，戒備心重的楊明更不時回頭張望，深怕被人發現似 的，反而莊思明就懶理男友自顧自食煙，唔知係咪餘怒未消，對住男友都冇 笑容，不過，情場高手楊明，見女友木無表情，臨走前都送個goodbye kiss冧 完女友先走，相當識做！不過當晚楊明在中環做完嘢，卻用其Benz戰車載埋 一女友人離開，盡顯風度，不過再唔識避忌，小心令女友莊思明冇安全感！ 拍拖未夠三年莊思明已經要兩度公開開火，空穴來風，楊明如果唔好好 反省，想做8億拿督女婿，恐怕有難度！
啜啖先走
不過，食完煙臨分開一刻，莊思明抬頭望一望男友，楊明已經識做啜啖女友先走！
同男友分道揚鑣，莊思明繼續入廠拍嘢，拖住兩袋嘢的楊明就極速揸車過中環出席活動。
停車場變身
當日同莊思明分開後，楊明將車泊到中環多層停車場，再極速變身，著番件白恤衫加老西，然後再行去中環碼頭出活動。
戰車載女
當日工作完畢，他就揸住其Benz戰車載一女友人過海，兩人行去停車場攞車期間就 一直好好傾。
伸手捉女伴
楊明更突然伸手拉一拉女伴手臂。
拍拖兩周年
上年四月，二人拍拖兩周年，莊思明就放相公開放閃更大讚男友讓她成為最快樂的人！
放閃氹女友
愛在IG放閃的莊思明，開火後只貼在娘家度歲的相。楊明踏正年初一即Po咀相氹女友，更以「小甜心」來稱呼女友！
開火有前科
男友多女埋身，莊思明發火鬧爆小三已經唔係第一次，16年 9月，龔嘉欣被指刻意改機票同楊明同機一齊飛英國，出席好友陳智燊宋熙年婚禮，便因為在機場亂噏話，唔係同楊明去度蜜月，叫大家唔好亂寫，因而極速辣著莊思明，更開火狂寸龔嘉欣，「楊明只會和我度蜜月！」 本刊記者捕獲莊思明孖家姐HighTea時激動拍枱，記者上前追訪時，莊思明一度眼濕濕。
延伸閱讀：
鋪路娶拿督女 楊明：我37歲，佢都一把年紀！
17歲簽無綫、現年37歲的楊明，經過多年歷練，眉宇間少了稚氣不羈，添了分成熟男人味，問到女友莊思明是否結婚對象，楊明即異常大反應：「梗係啦！你真係吖！」此話一出，連在場工作人員都忍俊不禁。
講到同女友莊思明嘅認識經過，楊明表示：「喺公司識，真係熟絡就係拍《愛·回家》，我入去拍咗一百集，成日都一齊食飯、飲嘢，咁囉！」欣賞佢啲咩？「佢係幾爽朗嘅人，同埋一個冇乜所謂嘅人，鍾意玩、鍾意開心，同我差唔多。我又係鍾意玩，唔係飲酒嗰啲玩，係鍾意戶外活動、好多朋友一齊，我覺得我哋幾似，相處得幾好，其實做人最緊要開心啫！」
同拿督個女拍拖有無壓力？楊明笑言：「佢個人冇乜所謂、又唔會好大小姐脾氣，做朋友嘅時候，唔會有感覺去諗呢樣嘢，係一齊咗，啲報道講起，我至記得佢係拿督個女，開頭係無壓力嘅，到啲傳媒講到好似好有壓力，咁咪有少少囉！到依家都一齊咗咁耐，同佢屋企人相處咗都一段時間，其實佢屋企人冇乜特別，只不過拿督個名畀人感覺特別，雖然佢屋企係有錢，但我覺得同普通人冇乜分別，都係有講有笑、好隨和，鍾意睇笑片。」
問到莊思明係咪結婚對象？楊明即答：「梗係啦！其實我都37歲，佢都一把年紀，都差唔多啦！我覺得我自己都大個嘞，其實我同佢相處幾開心嘅，我哋都係向呢個方向去行嘅，只不過無咁快啫，因為拍拖都係拍咗兩年幾咋嘛！」
有啲人拍咗三個月拖就結婚？楊明回應：「咁太快嘞，我覺得結婚唔係一件好簡單嘅事，擺酒、簽紙可能係好簡單嘅步驟，但結婚嘅意義唔係咁簡單，一定要知道雙方係可以遷就到、可以行到好遠，先可以行呢一步。我唔可以因為傳媒催兩催，我就好趕去處理。慢慢了解多啲、磨合多啲先啦！」
有無想四十歲前結婚？楊明話：「我就無，我阿媽就好想，佢曾經叫我『生咗先啦！』可能我阿爺阿嫲都老，同埋我係楊家最後一個仔！我無呢個計劃，但都一定要生個仔。辛苦嘞、辛苦嘞！哈！」
講到買樓同生意投資方面，楊明表示：「好細個嘅時候買咗一層，沙士前我一百零八萬買嘅，沙士之後，二百一十幾萬賣咗，我諗住升咗一倍，已經好好，但依家升到六百幾萬，我揼心口揼到、我阿媽又鬧我，依家考慮喺馬拉同芭提雅買獨立屋放租。生意方面，有馬來西亞嘅潮牌服裝店，依家都上軌道，有少少錢賺，香港搞緊燉湯生意，喺荔枝角港鐵上蓋，打算進軍寫字樓區，因為打工仔少湯水，同埋養生嘅嘢都多人注重，目標搞到連鎖。」
而問到keep fit之道，楊明就笑說：「呢排係咁做gym，因為之後要開一套劇，要fit少少。呢排要開工，又要keep，辛苦啲啲。」
身為拿督準女婿，楊明當然清楚拿督銜頭所代表含義及特權：「拿督有兩種，一種係授勳，一種係用錢買，Uncle (莊思明父)係授勳，出街時真係有需要，甚至可以申請搵當地警察幫手開路，而用錢買嘅拿督就無呢種特權。」
莊思明 莊思敏 住千五呎豪宅！
莊思明身為馬來西亞拿督的千金，和姐姐莊思敏都是住在貝沙灣千五呎大屋，有無敵海景露台，兩個人住都嫌大！
