胡然靠性感搶鏡 蒙嘉慧版白素最深入民心
撰文：東方新地｜圖片：新傳媒圖片庫、劇集截圖
「晶女郎」胡然演性感白素
《冒險王衛斯理之支離人》中，女主角白素由「晶女郎」胡然飾演，職業仲設定為國際刑警，不過胡然喺劇集中唔多展示到聰明絕頂同身手敏捷的一面，因為最重要的任務，當然就同歷代晶女郎一樣，就係騷身材！
雖然大部分時間密密實實，但其中一幕見到胡然一身白色性感睡衣，狂谷34E噴血身材，又有白滑美腿，晶女郎果然唔會令人失望！
蒙嘉慧版白素深入民心
在小說《衛斯理》系列中，衛斯理曾形容白素身材修長，嫵媚至極，係個絕頂美女。之後在多部作品中，都突顯出白素的過人智慧、身手高超及情深義重。雖然過住都有幾個女藝人曾飾演白素，不過喺在香港觀眾心目中，無綫於2003年劇集《衛斯理》中的蒙嘉慧版白素肯定係最經典！
外剛內柔
當年的蒙嘉慧樣貌標緻、身材高佻修長，同原著中白素確有幾分相似，每次一襲白衣出場都勁有仙氣，帶點cool的外表更演繹出白素的外剛內柔。不得不提的是，蒙嘉慧當年演白素時原來都已30歲，但感覺還是非常年輕！當然今時今日的Yoyo仲係好靚女啦。
當年無綫所拍的《衛斯理》中，故事講述羅嘉良飾演的衛斯理與白素之間的關係，兩人由冷淡到互生情愫，呢方面都算符合了原著。另外，當年有份演出的演員，仲有前排好紅的唐文龍、以及大家好熟悉的「KC」歐瑞偉。
好耐冇見蒙嘉慧
現年44歲的蒙嘉慧，1994年起已經開始拍電影，有著清秀可人的外表及高佻修長，大導演杜琪峯當年都對Yoyo甚為欣賞。2000年加入TVB後，佢演出唔少膾炙人口的劇集，一直穩坐無綫當家花旦之位，至2013年方離巢。
嫁伊健做幸福人妻
蒙嘉慧與鄭伊健因打羽毛球結緣，拍拖約七年後，2013年時與伊健在東京拉埋天窗，婚後Yoyo逐漸淡出幕前，專心做個幸福人妻，享受家庭生活！
蒙嘉慧近年已甚少會在公開場合亮相，不過睇番啲相其實佢都算keep得幾好，天生麗質、加上養尊處優確係寧舍不同～
舒淇都做過白素
雖然蒙嘉慧可能係大家心目中演白素的經典，但其實早喺2002年時，電影《衛斯理藍血人》中，舒淇都有扮演過白素，唔知大家仲有冇印象呢？
