甩吳千語狂歡 林峯 超市掃貨開P
撰文：東方新地
圖片：新傳媒資料庫、林峯IG
吳千語 主動出撃
近日傳出情變的林峯吳千語，先後回應分手一事，亦答得耐人尋味，問到是否仍是男女朋友關係，林峯只表示「我哋間中都有聯絡！」千語BB更揚言：「畀啲空間我哋！我哋工作上各有各忙。」原來向來爛蒲鍾意高攀有錢人的千語BB，大半年前在好友馬天佑拉線下，結識祖父是前全國政協施子青28歲的富三代施伯雄(Brian)。據知情者透露：「千語好鍾意黐馬天佑出去玩，就算同阿峯一齊，都仲想結識多啲富二代， Brian係天佑朋友，佢同千語喺飯局度識，千語知道對方屋企有米、屋企猛料，已經主動出擊，成日諗藉口約對方，好快兩個就撻著咗！」
連月來林峯忙於拍攝內地劇，拍完《獨步天下》，今個月又接拍了一部內地時裝劇，劇集在港取景。據知情者透露：「成大半年留喺內地開工，難得返香港，啲朋友輪住約阿峯飯局，又或者返屋企打邊爐同開P，趁機同朋友敍吓舊。」
心情輕鬆 狂掃飲品
日前，林峯同一女性友人，在西環超市上糧，兩人一邊揀嘢，一邊有說有笑，情變並未影響林峯心情。女性友人推住手推車掃貨，更加同林峯一邊研究買乜好，兩人揀嘢有商有量，最後買到成車飲品和乾糧。林峯雖然屋企有米，但他亦唔係翹埋手等人服侍的少爺仔，買完嘢，自己就秤住大袋飲品離開超市。
七人車任用
買完嘢，林峯同女性友人行去攞車，工人姐姐即幫女性友人攞嘢上七人車放好，之後直駛回林峯西半山嘉林閣寓所。
未過林父一關
五年前，林峯同只得19歲的吳千語，合拍電影《男人如衣服》撻著，林峯更加愛得全程投入，曾公開七講「好愛……好愛BB」愛的宣言，對女友呵護備至，不過拍拖不久，吳千語公主病性格好快現形，經常要林峯陪出埠玩兼豪買名牌，也因此一直得唔到林父歡心。據知情者透露：「同阿峯啱啱拍拖，千語已經好似膏藥咁黐實男友，阿峯好錫佢，乜都就晒女友，成日會陪佢出埠玩，千語好追名牌，阿峯就狂買嘢氹佢，嗰時阿峯啲朋友，都唔太鍾意千語啲公主病性格，依家佢哋分手，大家都替阿峯開心，覺得一啲都唔可惜！」觀乎林峯事業再起飛，感情事應該先放一邊，等對的人出現再出擊吧！
