法證先鋒6︱林盛斌阿Bob「取代」Bobby網民勁Buy 親自解話角色設定
其實阿Bob首集一出場已引爆笑點,面對星柏為求化驗不惜工本的處事手法,作為高星柏半級甚或一級的陶總自然眼都凸埋,更懶有型衝進星柏辦公室理論,務求以一輪嘴戰術擊退星柏,可惜最終熱臉貼著冷屁股!來勢洶洶的陶總先企圖以職級拋窒星柏:「我個title係acting總化驗師,高唔過你一級都半級」,豈料星柏只冷淡地回應:「所以個問題係?」眼見勢色不對的陶總續說:「好多人以為我老豆係保安局局長,我先坐到呢個位,覺得我廢(下刪三千字)…想蝦我,你明唔明?」星柏繼續冷淡:「嗯,不如講重點吖」,被逼到走投無路的陶總開宗明義指爆budget不能接受,但還是被星柏用真尿液做化驗大大拋窒,最終以一個「你咁都得」表情結束對話,十分搞笑。
網民提議阿Bob做男主角:好想集集都睇到陶總
對於阿Bob這個超乎想像的高級法證人員設定,網民普遍大為受落,除記牢了「最緊要唔好爆budget」這句台詞外,又大讚阿Bob天生就是笑匠:「都唔明點解TVB唔索性開部笑劇由阿Bob做男主角,佢唔使講嘢已經可以令觀眾笑喇,喜感十分強烈」、「好想睇阿Bob好認真咁講分析」、「唔知點解望見阿Bob樣,無論點都諗唔起認真,好想笑」、「Bosco佢哋忍笑會唔會好辛苦」、「一個滑稽一個冷漠,很搞笑」、「好想集集都睇到陶總」、「喜劇面孔,笑匠身形」、「你天生個樣就係一個笑佛,帶畀人哋正能量同開心」;並笑言阿Bob的出現令人想起《法證》元祖級演員Bobby(歐陽震華),網民:「睇落,好似阿Bobby返咗法證先鋒」、「搵唔到Bobby就搵阿Bob,都係差兩個字」。
阿Bob為角色設定解話
對於角色斬獲不少好評,Bob受訪時坦言多謝佳導:「首先,好多謝鍾澍佳先生搵我拍呢個劇,我曾經都有問過佢,搵我做一個咁專業嘅高級化驗師角色,得唔得㗎?跟住佢都有話畀我知,因為套劇好大部份嘅時間都係死人冧樓,劇情好沉重,想用我呢個比較調皮同有少少搞笑嘅角色,出嚟緩和吓啲氣氛。」
對於有網民笑言阿Bob演高級法證人員驟眼看撞樣麵包超人,阿Bob對此笑言:「麵包超人就由細到大啲人都咁講㗎啦,之後又有人話似一拳超人,又或者好多日本動漫角色,咁我梗係覺得冇乜所謂啦,最緊要大家覺得開心。」
![法證先鋒6 林盛斌 阿Bob回應網民支持。(圖片來源:林盛斌@Facebook)](https://imgs.orientalsunday.hk/wp-content/uploads/2024/08/whatsapp-image-2024-08-16-at-2.16.06-pm_158906581566beeece24720-1024x952.jpeg)