李美慧賀富商老公生日 竟送廿蚊紙幣一張！
李美慧與富商老公慶生
昨日，現年31歲的李美慧同富商老公曾文豪，飛到法國莊園開派對兼度蜜月，再順道慶祝老公57歲生日。心情愉快嘅Vivi於個人社交網上載多張相，見到佢雖然佗住6個月大BB，但當佢分別著起綠色及碎花長裙，身型依然望落纖瘦，連肚都唔係好覺眼！
據知，原來二人今次除咗係結婚派對、度蜜月、慶祝老公生日外，仲有奶奶都生日，認真喜事重重！
派對中可見，Vivi與眾人相處十分融洽，表現相處愉快。
派對期間，Vivi仲化身DJ打碟，但其實佢只係作狀打碟而已。
Vivi更於相中留言話：「Happy Birthday，老公大人，希望你開心每一日！工作順心如意，愛你」真係夠哂sweet！
除咗有同老公哂恩愛互攬外，Vivi仲同老公以花場作背景，嘟嘴錫錫，大放閃光彈！
派對中，仲準備有多款糖果之餘，亦有一個四層高的大蛋糕，望落夠哂排場。
兩公婆更於池邊跳舞，整個派對都氹得老公曾文豪非常開心，難怪老公笑得咁開心啦！
李美慧送廿蚊紙幣做禮物
老公生日，Vivi又點至陪過生日派對咁簡單，其實佢仲有特登整咗本紀念冊，仲有一張廿蚊紙！
唔好以為係一張普通廿蚊紙咁簡單，其實個重點係張鈔票的號碼同曾文豪生日日子一模一樣。
李美慧 宮女變闊太
近日在劇集《宮心計2深宮計》飾演「太平公主」陳煒親信宮女一角的李美慧，隨著劇集熱播，亦閃嫁富豪飛上枝頭變鳳凰，令唔少女人趨之若鶩。
大肚李美慧 爆喊嫁富商曾文豪
完婚後，一對新人接受傳媒訪問，新娘子李美慧開心話：「我哋儀式同普通新人一樣。」曾文豪接住話：「換衫，化妝，嚟到招呼朋友、簽紙。之前講話落雨，好彩今日天氣好好。」再婚兼有三名女兒的曾文豪表示自己嘅仔女有到場觀禮，因為儀式簡約，無安排啲孫做花仔：「兩個女外孫，同一個男外孫都有到齊。」
新娘子講到出嫁心情：「想令自己攰啲，所以出海游水游咗一個晏畫，但夜晚都係成晚瞓唔着，到依家都未瞓過。（心情係咪好興奮）唔知興奮定緊張，驚啲嘢安排得唔好，好多謝老公。不過頭先台上致辭時，腦中一片空白，唔知自己想講咩。」老公即刻話：「我都有好多嘢想講，怕overrun冇講。」
問李美慧幾時正式停工養胎？佢就話8月前會完成所有工作。老公有冇叫結咗婚之後唔好做嘢？曾文豪搶住答：「唔會，佢鍾意就得。」李美慧聽到個樣勁冧，挨實老公然後話：「我老公好好。」新娘着住束身腰間透視婚紗，無花誇裝飾，戴住條珍珠頸鍊，手上戴上鑽戒，簡約好睇。
婚禮中，請咗唔少TVB藝人同事出席，當中陳展鵬、楊明、楊卓娜、李綺雯同樂易玲等親自嚟賀新娘子，眾人更開心同一對新人影大合照。
開門利是 金牛成寸厚
郭千瑜受訪時，就喺個袋度拎出封開門利是，見到全部係1千蚊紙，仲有成寸咁厚，楊埕大讚新郎：「男家好大方，女方嫁得好，Peter（曾文豪）份人好好，乜都OK。今朝其中一個玩新郎環節，要喺尿片食啲嘢，本來唔使佢食，但佢都搶住食，仲話好肚餓，所以啲遊戲難唔到佢哋，兄弟團個個又好有義氣，做唔到嘅環節都會畀利是，唔會托手㬹。」
陸詩韻是姊妹團成員之一，而準新郎曾文豪弟弟曾文能是其舊愛，問陸詩韻到時會唔會撞到曾文能覺得尷尬，佢大方話：「唔會，我哋有聯絡，有時都會食飯gathering，唔會尷尬，同Auntie都熟。」
婚禮前一日，李美慧到1881試婚紗，新娘子全程神采飛揚，陀B的她更加胸前升cup，著上婚紗好有睇頭。
陀住曾家金叵羅，李美慧當然要小心護胎，化妝換衫一直著住平底鞋，直到影相時才由專人服侍換上高踭鞋。
