李璨琛認醉駕 $5000擔保候判
撰文：東方新地
李璨琛認醉駕 $5000擔保候判
李璨琛今早穿著黑色西裝和黑皮鞋現身觀塘裁判法院，在三名律師團隊陪同下出庭，他到場時神情凝重表示案件已進入司法程序，不方便透露太多，問到太太梁志瑩可有替他很緊張，他回應指：「緊張一定有，不要說她，我自己都有，多謝」。
李璨琛離開時直認初為人父有壓力：「女兒出生後感覺責任大了，這段時間都有反省，為了家人不會再酒後駕駛，已停了喝酒很久」。問到會否戒酒，他直言：「已經停咗冇飲，阿女出世後更加理解，責任大咗好多，經過深切反省自己，為咗自己、為咗屋企人、為咗社會，無論點都唔會再飲酒揸車，已經儘量避免飲酒，但係做呢行有時應酬一兩杯，汲取今次教訓，真係唔會再飲酒揸車。」至於可擔心會被重判，他表示會盡量配合法庭：「沒辦法，因為自己做錯事，希望大家引以為鑑，多謝關心」。
李璨琛嘅囡囡早前出世了，他於Instagram貼上女兒的小手，並宣布「Welcome to this world my sweet！」希望李璨琛做咗人爸爸生生性性，以後唔好醉駕啦！
李璨琛 飲醉就失控
年初四晚，李璨琛同廿四味一班兄弟團拜，男人聚埋飲番兩杯都好平常，不過，政府都忠告市民，飲咗酒千祈唔好揸車，偏偏李璨琛身為藝人未有以身作則，當晚同班兄弟飲天光，早上七時多還自己駕車返家，途經九龍城就被交通警截查，「吹波波」超晒標被捕，案件現交由東九龍總區交通部跟進。電影經常演問題青年的李璨琛，在圈中浮沉二十多年經常衝動鬧事，有報道指他試過醉酒打人又試過飲醉攬女，今次新年流流竟醉駕被捕。
據知情人士透露：「阿Sam(李璨琛)咁多年嚟都好鍾意飲酒，每次飲醉酒就失控又躁狂，飲到啤啤夫都唔知試過幾多次，阿Pae(梁志瑩)點會唔擔心吖！兩年前，阿Sam夜蒲飲醉攬女，啲相見晒報，搞到老婆好冇面，但佢解釋話當時自己斷晒片，阿Pae都原諒佢，但依家年紀唔細，阿Pae成日勸佢戒酒，要顧住身體，每次講完佢係飲少咗，但冇耐又故態復萌，阿Pae都冇晒佢辦法！」
承諾會戒酒
李太如此憂心，事關42歲李璨琛將做狗年老竇，屋企快多個新成員，真係一家大細將來靠晒佢。知情者透露:「阿Pae好鍾意小朋友，知道有咗之後佢兩公婆不知幾開心，Sam仲承諾會戒酒，冇諗過佢會咁唔生性，飲醉仲揸車，上個月阿娘(梁漢文)因為醉駕撞車，身邊成班朋友都話佢！當時阿Sam都有講話，點都好，但飲酒就唔應該揸車啦！點知呢頭講完唔夠一個月，自己又醉駕出事！」
幸好今次只係「吹波波」超標，未有發生交通意外，話晒就快做老竇，李璨琛真係要生生性性做人，唔好要老婆大住個肚仲為佢操心！
