戴祖儀25歲飛起羅天宇被指暗撻闊少堅稱單身

戴祖儀上位中羅天宇拍馬難追

戴祖儀備受無綫力捧，拍劇唱歌辮辮都掂，港男羅天宇則含住金鎖匙出世，自小生父出走，他跟母姓改嫁，生活無憂凡事有阿媽鋪路，曾在《愛‧回家》飾演馬子仁一角而為觀眾熟悉，惟至今未有其他代表作，媾女成績比事業更為出色，與Coffee（林芊妤）、苟芸慧及湯洛雯拍過拖，前任則是無綫女神戴祖儀。不過，近日有傳二人已分手，戴祖儀更被指與富二代搭上，指富二代闊少擲本六位數字給女神戴祖儀開藝術展。

在闊少在社交網，po出為戴祖儀度身訂造的figure，早前戴祖儀接受訪問便興奮指figure連她臉上的痣都有詳細打造，非常貼心。

戴祖儀早識闊少齊睇演唱會歎西餐

據報導指戴祖儀與該名闊少Michael相識逾年，有指闊少一直力追女神，不過戴祖儀一向視他為兵，更一邊吊住羅天字，「女神收割機」遇上老手，結果仍是失敗而回。近日戴祖儀被指黐實闊少而狠飛羅天宇，其實闊少Michael早於兩年多前已出現，二人曾結伴欣賞張學友演唱會又齊到張敬軒的仙后餐廳撐枱腳，Michael更公開留言：「I want nobody nobody but you👉🏻👉🏻@joeythyee」指實及tag戴祖儀，擺明車馬示威。對於新緋聞，戴祖儀堅稱自己單身，更指再寫落去就冇人追。

戴祖儀與闊少Michael到張敬軒的仙后餐廳撐枱腳，Michael更大讚軒仔呢位老闆友善會與客人互動。

戴祖儀急起直追羅天宇屋企有米唔憂做

戴祖儀與羅天宇被斷正多次約會，羅又經常揸車接送戴祖儀返無綫開工，不過當時二人為保形象keep住地下情。眼見戴祖儀備受力捧拍劇、做主持又唱歌，羅天宇母親不甘兒子被新女拋離，出手為仔爭取演出機會，劇集《香港愛情故事》開拍前，男主角一改再改，由張振朗變楊明再變羅天宇，羅母為仔打盡人情牌，得咗！

羅天宇直認早年不懂得把握機會，試過兩年冇劇拍被投閒置散，不過有母親在背後做最強後盾，為他成功爭取做男一，唔想被女友戴祖儀拋離幾條街，要急起直追喇！

羅天宇媽咪靠做生意及炒樓起家，主力經營位於西貢的4萬呎的燒烤場生意，投資有道的她高峰期一度手持麗港城、匯景花園及黃埔花園等價值逾三千萬物業，現時一家居於元朗翠巒獨立屋。羅天宇同母異父的細佬胡㻗四年前也參選港男入行，三母子感情要好。

羅天宇是人生勝利組的表表者，08年參選香港先生獲得少年組冠軍，有指其母羅俐雅（Barbi Law）與不少圈中人稔熟，當中包括無綫高層，當年搭通天地線，令羅天宇順利入行做明星，雖然機會不斷，但羅天宇並未盡全力向上爬，拍完處境劇《愛‧回家》入晒屋，他竟然兩年冇劇拍，日日游手好閒，羅天宇被外界指無心工作，媾女大過天。

25歲的戴祖儀加入無綫只有兩年，除了簽星夢娛樂做歌手，去年開始工作量明顯增加，有份主持多個綜藝節目《粵講粵㜺鬼》、《長命不老》、《學是學非》等，並在劇集《多功能老婆》中飾演幼稚園老師 Miss呂，憑青春無敵及長腿成為新一代女神。

羅天宇曾被本刊斷正駕駛其Tesla電動戰車送戴祖儀返回將軍澳電視城，不過他過了正門100米才停車，讓戴祖儀施施然落車。男住元朗，女住啟德，又唔係順路，此地無銀。

羅天宇為圓母夢做藝人靠阿媽終執三攤做男一

近年羅天宇對工作重拾熱誠，不過角色與演技都未有太大突破，據知情者透露：「Joey（羅天宇）都承認以前欠方向同目標，做事又得過且過，拍完《愛．回家》有兩年冇劇拍，佢當時有諗過係咪唔好等？不過羅媽媽就好堅持，因為佢後生時都入過無綫訓練班，但讀咗一半就冇讀，所以好想個仔幫佢圓埋個明星夢，仲成日催促Joey要著緊啲自己嘅演藝事業，好想見到個仔走紅。再加上Joey新女友戴祖儀係力捧花旦，入行時間咁短已經彈起，再係咁佢哋距離只會愈嚟愈遠，近年羅媽媽都做咗好多嘢，喺背後幫Joey講盡好話，所以好多監製都會畀面，有好角色都搵佢。」去年底，無綫開愛情小品劇集《香港愛的故事》，最初男主角屬張振朗，而女主角就係龔嘉欣，後來因為張振朗無檔期換上楊明，但最後卻落在羅天宇身上。