《死侍2》可愛美女忽那汐里 演Yukio大受歡迎
撰文：東方新地｜圖片：電影劇照、截圖、IGshiolikutsuna
《死侍2》日本美女忽那汐里
《死侍2》中，日本女星忽那汐里飾演Yukio雪緒，一頭粉紅色齊蔭髮型，聲線可愛嬌嗲，在片中為另一角色「彈頭」的女朋友。Yukio能夠操縱雷電去使出電鞭，有型！雖然戲份唔算多，不過Yukio每次出場都同死侍有著可愛的互動，簡單一句「Hi Wade！」以及迷死人的笑容，停留喺小編腦海好耐好耐！
Hi Yukio！
《死侍2》上映後，忽那汐里隨即受到世界各地影迷的關注，Instagram的粉絲數目不斷上升，最搞笑係唔少人都會喺相片留言「Hi Yukio！」！原因係片中死侍每次見到Yukio時，都會煞有介事咁打招呼：「Hi Yukio！」，然後忽那汐里就會回應一句：「Hi/Bye Wade！」可見佢喺電影中與死侍的互動，已經深入民心！
澳洲長大
1992年出生的忽那汐里現年25歲，出生於澳洲悉尼，自小在當地長大，所以講得一口流利英文。忽那汐里本應擁有日澳雙重國籍，但根據日本法律，佢必須在22歲之時選擇其中一國之國籍，而佢最後選了日本籍。忽那汐里2006年時回到日本發展，參加全日本國民美少女比賽並獲得「審查員特別獎」，小編就覺得佢當之無愧啦！
演出經驗豐富
忽那汐里年紀輕輕但演出經驗豐富，曾在大熱日劇《家政婦三田》飾演家中長女一角，因此廣為日本觀眾認知；另外仲有《鴨川食堂》、《3年B組金八先生》等。
曾獲金像獎新人獎
忽那汐里亦有出演真人版《名偵探柯南》中的女主角毛利蘭，佢更於2014年憑著電影《不可饒恕》及《艷之夜》獲得第37回日本電影金像獎新人獎，前途無可限量呢！
講得一口流利英文確係極大優勢，忽那汐里曾參演Netflix原創電影《局外人》(Outsider)，與「小丑」謝勒力圖(Jared Leto)、淺野忠信等前輩猛人合作。如今忽那汐里正式於Marvel宇宙登場，未來可能有更多機會見到Yukio！
編劇都話要加佢戲份
你話如果講索講身材，忽那汐里當然唔及片中飾演死侍女朋友的Morena Baccarin，不過有著可愛齊蔭髮型、又圓又大的眼睛，傻呼呼帶點稚氣，相信唔少男士都同小編一樣，散場之後即刻search佢係何方神聖！忽那汐里正值25歲之齡，可愛親和冇難度，同時又緩緩地散發半熟女人魅力… 據知《死侍2》兩位編劇都對其讚賞有加，表示今次Yukio戲份太少，希望未來會好好對待呢個角色！
