歌手1個原因揀《小薯茄》棄《勁歌》?連台灣歌后都要搵佢哋宣傳
網民指歌手因1原因寧願上《小薯茄》都唔上《勁歌金曲》?
近日《勁歌金曲》嘅停播惹來網民熱議,有大部分網民都認為現代當紅歌手有大把宣傳渠道,可以選擇喺自己社交平台或Youtube頻道宣傳自己歌曲,並唔需要上局限多多、收視又低嘅《勁歌金曲》作宣傳。其中更有說法指當紅歌手都會認為《勁歌金曲》為「上世紀嘅產物」,要上節目宣傳都會選擇Youtube人氣頻道《小薯茄》,都唔會想上《勁歌金曲》。
![小薯茄 youtube 小薯茄 近年大批歌手都開始選擇上Youtube人氣頻道小薯茄作宣傳。](https://imgs.orientalsunday.hk/wp-content/uploads/2023/05/311646673_690193759134056_3705735751867204577_n_1469102987646ef1a0277e4-1024x685.jpeg)
台灣歌后蔡健雅上《小薯茄》宣傳
近日就連台灣歌后蔡健雅都有上《小薯茄》宣傳將於6月舉行嘅演唱會,《小薯茄》派出自家男團FINALLY親自飛去台灣,仲潛入小巨蛋停車場求見蔡健雅!FINALLY各成員仲渾身解數,又唱歌又表演魔術,只為打動蔡健雅,做她的紅館演唱會嘉賓,場面尷尬又好笑,可見《小薯茄》等新一代宣傳方法的確深受歌手們歡迎。
![小薯茄 youtube 《小薯茄》派出自家男團FINALLY親自飛去台灣。](https://imgs.weekendhk.com/wp-content/uploads/2023/05/videoscreenshot-youtube-finally5pomato-650_1502539226647412ff4ecc7-1024x576.jpg)
網友對這一幕反應熱烈,讚《小薯茄》宣傳好有創意!
「好勁,呢個合作宣傳做得好好,小薯茄真係得專門賣尷的finally 做到,個flow 又自然又好笑」
「非常之有創意的演唱會宣傳,”給蔡健雅一個交代”, 咁都諗到,真係笑死咗」
「換個角度睇,其實無論係小薯茄嗰邊搵得到蔡健雅定係蔡健雅嗰邊搵小薯茄幫手宣傳,都可以show得到小薯茄喺台灣入面算係幾高知名度嘅香港channel」
大牌歌手力撐《小薯茄》玩得超放
翻查過去一年上《小薯茄》宣傳嘅歌手都至少超過10位,由本地新人P1X3L、MC張天賦、洪家豪開始到大牌歌手鄭秀文、鄭中基、張敬軒等人都有上過《小薯茄》作宣傳。有網民指出《勁歌金曲》主持方式過於死板,相反《小番茄》就比較活潑,題材也比較適合年輕人,就連一班形象正經嘅藝人都玩得超放。除咗有鄭秀文自嘲講笑話之外,梁詠琪同鄭伊健都有上過《小薯茄》大玩「雪櫃冷笑話」,夠曬貼地又玩得,成功宣傳到個唱之餘,形象又變得更加親民,一舉兩得。
![小薯茄 youtube 小薯茄 鄭秀文 Sammi Sammi開估後自己都好high,笑得好開懷!](https://imgs.orientalsunday.hk/wp-content/uploads/2023/02/25a6f458-f003-4744-9f52-cf6a7c1f31e7_33586868663fcd3da53680-1024x819.jpg)
TVB推3個音樂節目《勁歌金曲》變《勁歌金榜》
《勁歌金曲》已經結束,但TVB再有新搞作,推出《勁歌金榜》,金榜名單由昔日10個增至20個,主持許文軒報榜外,亦會訪問不同歌手分享音樂大小事,重點係要帶出「香港仲有好多高質素音樂」的重要信息,於27日節目首播。《勁歌金榜》首集仲請來張敬軒訪問「打頭炮」,張敬軒在節目分享創作歌曲靈感來源、踏入40歲後人生觀嘅轉變外,仲會分享之前在英國倫敦開騷及拍MV嘅經歷。除《勁歌金榜》外,TVB同時推出兩個音樂節目加大聲勢,包括於周一至周五深夜深夜播出的《MUSIC BREAK》,以及下月4日起,逢周日晚的播出的《J Music》。
網民不為《勁歌》結束感到可惜:TVB自己攞嚟賤
不少網民都留言表示認同該說法,認為《勁歌金曲》嘅結束並唔可惜,仲留言狠批指:「TVB自己攞嚟賤」。網民認為無綫與四大唱片公司決裂係《勁歌》嘅最大死因,大批當紅歌手開始上其他節目,令《勁歌》嘅吸引力大跌。此外,亦有網民認為以前TVB一台獨大,歌手們不得不上《勁歌金曲》宣傳,但自從各種社交媒體嘅興起,歌手們有大把選擇,唔需要再局限於沒有宣傳價值嘅《勁歌金曲》。
![小薯茄 youtube 小薯茄 曾志偉上任之後曾主動同四大唱片公司破冰,試圖將《勁歌》起死回生](https://imgs.orientalsunday.hk/wp-content/uploads/2023/05/photo_6296131970006103227_y_853632705646ef3335028b-1024x682.jpeg)
《勁歌金曲》正式停播 主持愈來愈頹
《勁歌》主持其實唔止得崔建邦,過往好多有份量歌星都做過!例如劉德華、周慧敏、李克勤、呂方、古巨基等。2000年有何韻詩、at17、鄧健泓;2011年改由糖妹、金剛上陣,翌年換上崔建邦及朱千雪。之後巨聲幫及星夢幫冒起,成員吳業坤、譚嘉儀、胡鴻鈞、何雁詩、許廷鏗、吳若希、謝東閔、羅鈞滿、鄭世豪、姚兵、林師傑及鄭俊弘輪流主持,近年《勁歌金曲》收視麻麻,有指係因為網民已經對小圈子節目同頒獎禮覺得無吸引力。
![小薯茄 youtube 小薯茄 勁歌金曲 黃宗澤 勁歌金曲](https://imgs.orientalsunday.hk/wp-content/uploads/2018/10/nhv4dxh3MJN7gxp/23244034_1598717440151332_3616811308112042451_n_5189348095bbc45f235590.jpg)
關心妍攞錯獎黃宗澤唱《K歌之王》
過往勁歌頒獎禮出現不少經典場面,2008,曾志偉宣布關菊英得到「傑出表現獎」金獎,此時關心妍竟然來到台中「領獎」。雖然當時崔建邦解釋說二人同樣姓關,互相祝賀,但尷尬程度足以令一代樂迷記憶猶新。同年,黃宗澤在頒獎禮表演留下黑歷史,即場被抽中與陳奕迅合唱《K歌之王》,結果被網友恥笑唱功爭太遠!
![小薯茄 youtube 小薯茄 勁歌金曲 黃宗澤 勁歌金曲 呢幕真係經典!](https://imgs.orientalsunday.hk/wp-content/uploads/2023/05/17-5-2023-5.29_23888733064649e8fd834d.jpeg)
曾志偉上任救亡《勁歌》 向四大唱片破冰
至2021年,曾志偉上任TVB高層,諗計將《勁歌》起死回生,除咗主動同四大唱片公司破冰,仲改革《勁歌》,包括邀請音樂人組成「導賞團」,與現場觀眾互動。在新版《勁歌金曲》錄影,無綫曾找來尖酸刻薄的DJ陳海琪擔任節目的「音樂選民」,何雁詩上台唱完新歌〈灰夠〉之後,被陳海琪批評得體無完膚,面對突如其來尖銳的抨擊,何雁詩當眾爆喊!唔少網友當時負評如潮,此為對歌手唔太尊重。
![小薯茄 youtube 小薯茄 勁歌金曲 黃宗澤 勁歌金曲 何雁詩](https://imgs.orientalsunday.hk/wp-content/uploads/2021/04/112_53278123860824b8a9740a.jpg)
《勁歌》淪為雞肋 只淨15分鐘
現在可能問10個人,有9個都唔知《勁歌》幾時播同播幾耐,《勁歌》已經失去昔日光輝,由原先改革後播放一小時變為半小時,更由黃金時段晚上9點半改至10點半,可惜收視仍不足10點,到現時將每集時間再縮減到至剩15分鐘。
![小薯茄 youtube 小薯茄 勁歌金曲 黃宗澤 勁歌金曲 3月初《勁歌》大改革,播放一小時兼由Eric Kwok、糖妹、Oscar塗毓麟主持。](https://imgs.orientalsunday.hk/wp-content/uploads/2021/10/-2021-10-27-11.40.07_4652240706178d39ee812c-1024x550.png)