封盤唔封胸《3日2夜》咪神胡美貽撻著超級富二代
《3日2夜》「元祖級」咪神胡美貽歸位
《 3日2夜》向來以靚女著三點式玩水、浸溫泉作賣點,多年來捧紅唔少小花,張曦雯、張秀文、陳婉衡、陳偉琪等個個博到盡喺節目中著泳衣曬太陽、浸溫泉,盡騷火辣身材,更獲網民熱捧!家陣節目即將復活,一班咪神亦蠢蠢欲動,其中擁有35D逼爆上圍、「元祖級」咪神之一嘅胡美貽亦將會重出生天再度亮相!
![2017年參選港姐落敗後即入讀藝員訓練班,翌年正式簽約TVB成為旗下經理人合約藝員。](https://imgs.orientalsunday.hk/wp-content/uploads/2020/06/2_1175a_aunt_p10_11_3784539595ee0475fd6f56-846x1024.jpg)
自家生意受疫情影響 負面情緒爆燈暴瘦廿磅
2017年參選港姐,之後入讀藝員訓練班,胡美貽其實拍過唔少劇集如《 愛·回家之開心速遞 》、《 機場特警 》、《 黃金有罪 》、《 白色強人 》、《 再創世紀 》等等。早前於《 法證先鋒 IV 》中更扮死屍被李施嬅解剖,只著住底衫褲瞓喺冰冷嘅手術台上,專業演出獲唔少網友讚賞㖭!
![早前在 TVB 熱播劇《 法證先鋒 IV 》扮死屍,由李施嬅負責解剖,胡美貽透露為求逼真,拍攝時只著內衣褲躺在冰冷鐵床上。](https://imgs.orientalsunday.hk/wp-content/uploads/2020/06/x1_1175a_aunt_p10_11_735420225ee0477104b9a.jpg)
除演藝事業外,26歲嘅胡美貽百足咁多爪,年前更殺入商界大搞榴槤甜品生意,仲連開三間分店,可惜近月由於疫情影響,生意一落千丈,為慳人工開支更親自出馬落舖頭幫手,樓面、打雜一腳踢,食冇定時搞到體重暴跌近廿磅,就連生理周期都亂晒龍, 再加上負面情緒影響,胡美貽自稱要睇心理醫生呀陰功!好彩家陣《 3日2夜》翻生,嚟緊10月又有工開,疫情又漸漸放緩,應該明天會更好嘅!
![Nicole年紀輕輕已甚有生意頭腦,就連名食家蔡瀾都幫佢做生招牌。](https://imgs.orientalsunday.hk/wp-content/uploads/2020/06/highlights_40667110_293720268094705_3281304823156178944_n_3050803945ef1ae2780232.jpg)
拖富二代鬧市出巡
身為新一代宅男女神的胡美貽已單身一段時間,日前佢宣布「封盤」,被影到與富二代Reeve拍拖出巡,期間又拖又攬,非常甜蜜。據知胡美貽男友Reeve今年28歲,從事餐飲、金融及外國地產生意,二人拍拖已大半年。男方家族投資有道,最近以3.3億出售持貨七十年的旺角單幢物業,名副其實係大富之家。而Reeve與不少圈中人熟落,曾在社交網上載與伍樂怡滑雪、跟JW飯敍的照片,又不時大晒名車,可以講得上係超級富二代。
有米男友唔止錫到胡美貽燶,仲唔介意做司機接送同埋陪女友行街,當日Reeve駕駛價值200多萬嘅名車送胡美貽返屋企。事後Nicole受訪時大方認拍拖,仲話依家係開心嘅。咪神封盤都唔緊要,最緊要唔好封胸就得喇!