孖囝囝出騷搵錢 黎諾懿教香香造人秘技
廣告
黎諾懿與岑麗香前晚出席迎新春揭幕禮，黎諾懿首次帶埋囝囝「小春雞」黎峰睿齊齊亮相，有子萬事足嘅諾懿更即席向香香傳授生仔秘技㖭！
撰文：東方新地
圖片：東方新地
囝囝賺錢老竇享福
對於兩父子首次拍住上工作，黎諾懿表示非常開心，既可以一起賺錢，又可以當親子活動，一舉兩得！說到兒了子比他厲害，年紀輕輕就已經可以出來賺錢，諾懿話唔介意囝囝出席公開活動，但拍電視劇就免問：「佢賺錢叻過我細個，遲啲養埋爸爸，咁爸爸就可以全職照顧佢。出席活動、拍廣告都冇所謂，不過拍劇就唔好，因為太辛苦，依家流感咁犀利，錄影廠又多菌，如果佢病咗我老婆會殺咗我。」諾懿揚言希望明年追番個豬女，實行湊個「好」字後老婆就可以封肚收工。
生仔揀朝早
至於一直努力造人嘅岑麗香見到可愛嘅「小春雞」，都忍唔住要逗對方玩，香香話唔希望為生B令自己有太大壓力：「講太多以為我有咗，唔講又以為我唔想生，生或者唔生最好就係冇壓力，順其自然。」身旁嘅黎諾懿仲即席向香香傳授生仔秘技：「生仔就揀朝早做，因為兩個都係最精神、最活躍嘅時候，生女就要夜晚做。」不過香香就話生仔還是生女都唔到佢揀，總之一切順應天命：「仔女都冇所謂，今時今日男女都一樣。」
