周星馳疑復出失敗 00後嘲:這麼醜也是明星
星爺開IG勤出post 曝光率激增
今年60歲嘅「星爺」周星馳,在10月無預警下開設IG帳號後,即刻吸引大量粉絲關注,如今已有32萬粉絲追蹤,當中不乏各界名人明星。星爺亦不時更新近況與粉絲互動,第一個post公開招聘人才就吸引近15萬人讚好,近8000個留言。隨後星爺就引用#createwithstephen 嘅 hashtag上載咗幾幅以往電影嘅劇照及生活日常,就連限時動態更新亦相當頻密,而星爺更會無區別對待地回覆留言,除咗有回覆蔡卓妍(阿Sa)、楊穎(AngelaBaby)同張柏芝外,亦會同粉絲鬼馬互動,表現活躍又親民。對於星爺隱世多年忽然激增曝光率,外界不時盛傳和猜測星爺有新搞作,但至今仍未有確實消息傳出。
回憶殺失敗? 內地00後唔識仲嫌樣衰!
星爺係IG頻頻出post,當中有幾個post係以往電影嘅劇照,與粉絲互動亦不時提及自己作品嘅經典對白和情節,似乎大賣回憶殺,勾起大家嘅集體回憶。雖然星爺世界各地有仍唔少影迷,尤其星爺近年雖然醉心內地市場,但有內地媒體街頭採訪00後對娛樂圈男明星嘅認知,當向受訪嘅年輕路人展示星爺相片時,均表示不認識或忘記了。而最近星爺因為喺IG分享衝浪嘅影片引嚟AngelaBaby回覆而登上微博文娛版,有00後就引用#周星馳尾波衝浪嘅hashtag 發文:「這人誰啊?長得這麽醜也能出來當明星了?」「Baby和那個醜老頭說話?」雖然有不少網民留言對樓主不認識周星馳而表示詫異,但同時表示星爺大名喺現今內地00後中似乎鮮為人知。
全盛時期票房過億片酬過千萬
90年代係香港電影嘅黃金時代,亦係星爺嘅全盛時代,其中更創下唔少票房紀錄。喺1990-1999呢十年間嘅票房冠軍,基本上係被「兩周一成」(周潤發、周星馳、成龍)所統治,其中周星馳一人獨占5部,成最大贏家。而喺1992年,星爺一年拍下7部電影,其中5部都成功登上當年票房十大。而當年十大票房總和係3億8,895萬,星爺5套電影都已經佔咗2億1,529萬,多過一半。係2000年後,星爺後勁再發力,《少林足球》《長江7號》票房均破4200萬美元,《功夫》票房更達1.049億美元。後期星爺隱居幕後,由佢參與監製及制作嘅《西遊·降魔篇》同《西遊·伏妖篇》合共高收4.63億美元,要數最就係2016年由佢監製、編劇及導演嘅電影《美人魚》,以全球5.55億美元票房,成為全球史上票房最高的非好萊塢電影。
星爺一日片酬夠買一層樓
票房及口啤都咁高,星爺片酬亦不菲,黄百鳴就曾係吳君如主持嘅訪問節目《星星同學會》中透露星爺接拍《97家有囍事》片酬就高達1500萬。同樣王晶上《星星同學會》做嘉賓時亦大爆邀請星爺拍7日電影《千王之王2000》戲份時,每日片酬就高達120萬港元以上。要知道以當以一個500呎單位計算,1999年買入新都城二期一單位,價錢約為170萬元,星爺1日片酬就差不多可以購買一個單位。