吳岱融半億物業遍布東南亞 揭隱形富豪真身
太太鍾淑慧(Lily)人如其名，賢淑又聰慧，早年走遍國內登台搵人仔，有錢即四圍買磚頭，唔止國內有物業、就連東南亞及香港都有樓揸手，保守估計手揸半億物業，去年鍾淑慧把國內5個物業套現逾千萬，夫婦二人身家分分鐘過億。老公吳岱融愈撈愈掂，鍾淑慧近年減產做跟得夫 人，出入有司機接送，等20歲的乖仔出埋身，下半世就無憂等享清福。
撰文：東方新地｜圖片：新傳媒圖片庫、吳岱融FB
吳岱融 演黑警入晒戲
58歲的吳岱融愈老愈型，繼之前《巨輪II》的鷲哥演得入型入格，最近在《飛虎之潛行極戰》中，吳岱融因為搭上黑幫頭目之女伍詠薇，做臥底扶搖直上，亦正亦邪入晒戲，人氣有增無減。其實過去一年，吳岱融拍劇無停過，再加上在國內的代言活動及商演，令他登上事業頂峰，就連早年奔波全國登台的太太鍾淑慧，亦退下火線讓老公出去拼搏，她則管好頭家相夫教子。
登台皇后搵人仔
原來多年來鍾淑慧都沒有引退過，早已洞悉先機北上掘金的她，曾笑言自己星運不及老公，但登台運更勝一籌，超過十年時間在大陸穿州過省登台，她豪言香港藝人在大陸走埠登台，許秋怡認了第一，沒有人敢和她爭第二位，她走遍大江南北，由西藏拉薩到東三省、雲貴高原，甚至蒙古、新疆等地，直到五年前不幸小產，心情大受打擊的她開始減少工作，而吳岱融亦回流香港發展。
鍾淑慧在大陸登台收的都是現金，十幾年前已開始在廣東省投資買樓，高峰時在大陸有五層樓，當年樓價低幾十萬就買到一個單位，而她買樓不喜歡出租，一來租金回報率低，二來她怕遇著麻煩租客，幾年前她把所有國內物業賣掉套現逾千萬，每次說起買樓經她都表示全靠當年的努力耕耘。
據知情者透露：「早年Hugo(吳岱融)事業發展麻麻，Lily就一直喺大陸跑登台，佢好受歡迎，兩公婆咁忙邊有時間使錢，所以有段時間狂買樓投資，除咗國內，佢哋喺新加坡、大馬同泰國都有物業，早年佢哋好鍾意去芭堤雅玩，仲買咗間向海嘅度假屋㖭！3年前Hugo返香港簽無綫，Lily又開始喺香港買樓，為咗方便返大陸做嘢，佢專攻粉嶺同沙頭角啲樓，地方大啲空氣又好啲喎！」
吳岱融從來都不管錢，他把所賺的錢全部拱手給太太鍾淑慧，讓她手握財政大權把錢愈滾愈大，全靠太太的最大嗜好買樓，今時今日夫婦二人擁有的物業遍布東南亞，再加上在香港沙頭角有一間獨立屋、粉嶺一間私樓及一間居屋，所有物業總市值估計逾半億。
買樓寫老婆名
吳岱融默默做賺錢，夫婦二人幾乎所有的物業，都寫在鍾淑慧名下，吳岱融曾在訪問中覺得這是為人夫理所當然的做法，又話自己完全冇耐性處理呢啲嘢，財政由老婆管完全是他意願，老婆從無要求過。「我都五張幾嘢，總之有戲拍，打吓機，我就開心。我已經唔再在乎榮華富貴，利誘同誘惑，我睇得好淡。」
吳岱融與鍾淑慧早年有段時間在港消失得無影無蹤，所以外界有傳夫婦二人有經濟問題，至於曾為錢拍三級片，吳岱融表示接拍根本不關錢事。而吳岱融一家三口曾搬到馬來西亞及新加坡定居，之後又去過番禺住了一段時間，夫婦二人一直努力搵錢與投資，發咗達做埋隱形富豪都冇人知。
互相扶持23年
89年拍拖，95年結婚，吳岱融與鍾淑慧經歷23年的婚姻，感情亦曾有過高低起伏，97年兒子Justin出世，二人忙著工作，兒子從小由婆婆湊大，不過近年他們一直把他帶在身邊，早年在國內奔波，夫婦二人決定定居番禺，安排兒子入讀當地的國際學校，前年Justin要返新加坡服兵役，吳岱融又陪仔返老家定居兩年，一家三口感情深厚。現在到吳岱融要留港搏殺，妻兒都在背後支持。
今年吳岱融繼續大豐收，拍完正在熱播的網劇《飛虎之潛行極戰》，又投入其他網劇演出，日前又開拍無綫新劇《牛下女高音》，而鍾淑慧就做跟得夫人，在港陪拍劇，出埠工作亦夫唱婦隨寓工作於娛樂。早前見鍾淑慧在九龍城廣場行住街等老公，之後由司機接送返粉嶺寓所，再一次證明夫婦同心其利斷金，共富貴之餘最緊要係恩愛。早前本刊曾找吳岱融回應是否手持半億物業，他未有正面回應，只謙虛表示身家夠使夠用。鷲哥依家個勢燒得咁旺，搏殺多幾年應該可以印印腳退休。
年賺過千萬
近年無綫不少小生、中生離巢，令老戲骨非常搶手，吳岱融回歸無綫後未停過，人氣急升後登台、代言工作更接踵而來，有指他年賺過千萬，人氣與收入成正比。
吳岱融：屋企使費大有排捱！
記：本刊記者 吳：吳岱融
記：近年回流香港發展得好好，係咪賺咗好多錢？
吳：係多咗好多工作機會，收入係多咗，不過唔係發達，總之夠使夠用囉！我仲要捱㗎！屋企使費大，個仔仲讀緊書。
記：簽咗邵氏好忙？
吳：係啦！主要都係拍網劇同商演，今年啲期已經排到密麻麻。
記：係咪有錢都會投資買物業？
吳：呢啲我真係唔知，老婆話事。
記：依家喺香港有幾多層樓？係咪東南亞都有物業？
吳：邊度有吖？呢啲唔講啦！
記：見你同太太都有司機接送喎！
吳：我哋住得遠，又成日要返無綫開工，出入方便啲，冇咁辛苦。
記：你人氣勁賺咁多，太太唔使做？
吳：太太嚟緊唔使咁辛苦，佢會接少啲工作，我會努力孭起頭家，等我冇咁忙都想同佢去吓旅行。
吳岱融阿仔愛攝影
20年來，兒子Justin跟住吳岱 融夫婦四海為家，曾於新加坡、大陸及香港定居，對於管教兒子，二人不會很嚴厲，吳岱融更是出名的廿四孝老竇，十分痛錫兒子，坦言無論他將來想做甚麼，他都會支持。
在Justin的IG可看得出他平時的生活都很健康，不外乎與朋友外遊及拿住相機四出獵影，乖仔愛藝術攝影，而且性格偏向文靜，似乎對幕前工作興趣不大。
日前鍾淑慧與20歲的兒子Justin在又一城行街，兩母子邊行邊傾好開心，阿仔高阿媽半個頭，生得青靚白淨，唔使捱有父蔭幾咁無憂。
鍾淑慧行開一陣去洗手間， Justin乖乖等阿媽，睇得出母子感情非常好。
吳岱融是新加坡人，所以囝囝Justin 16年要去服兵役，今年服完兩年兵役回港，鍾淑慧接受訪問時話：「真係好開心，自從個仔當兵後幾乎搞到我一夜白髮！」鍾淑慧仲話囝囝會繼續讀書。
身為家中獨子，吳岱融與鍾淑慧對Justin自小疼愛有加，不過早年因忙於工作走埠，兒子有段時間交由外婆照顧。
吳岱融與鍾淑慧結婚23年，婚姻也曾因摩擦出現暗湧，年初他曾推出情歌〈回去愛你十億秒〉送給他眼中賢良淑德、默默付出的老婆鍾淑慧，更夫妻檔拍MV，情到濃時咀嘴，MV更由囝囝負責剪片。
吳岱融 爸爸的告白
吳岱融兩父子在節目中的互動真的十分可愛，會互相開開玩笑，亦有深情一面。吳岱融還在節目中表示：「爸爸為咗你，乜都得。」而Justin表示，兩父子很少吵架，因為媽媽鍾淑慧就是他們之間的防火砂，扮演協調的角色，不過她卻直言：「兩邊都要氹，很難做。」
男人老狗，啲肉麻說話好難開口，好多時兩父子都未必會講心事，甚至未必好了解對方。節目中吳岱融同Justin用寫簿仔呢個方法交換「資訊」，起碼依家吳岱融知道兒子的… 星座啦！
首度父子檔出活動
早前吳岱融同Justin出席一商場的父親節活動，首次父子檔上陣，兩仔爺同靚女陳凱琳齊玩遊戲，不過Justin始終初面對鏡頭，有啲怕醜！吳岱融表示仔大仔世界，唔會阻止佢入娛樂圈，不過首要係讀好書先！
