《入住請敲門2》文青女神林婷表現反常網民嚇親：真係好癡線！

第一季林婷未到戲肉就退縮

播第一季嗰時，大多觀眾聽到林婷個名都已經覺得煩，因為佢喺第一季嘅表現實在慘不忍睹，去到邊都大叫「好驚」、「唔得啊」，被唔少網民大鬧佢唔專業，真係細膽就唔好接呢啲Job咁話啊！相比起另一位主持人莫竣名自然得嚟又合理地淆底、間中爆吓粗嘅表現，真係差啲啦⋯⋯

真係唔知林婷喺呢一年入面經歷咗咩，點解今季可以突飛猛進成咁，唔驚青、冇鬼叫，挑機不同都市傳說都不在話下！人又靚，把聲又好聽，林婷咁淡定冷靜噉介紹唔同猛鬼地方，反而令小編覺得更加心寒，隔住嗰芒都驚驚地⋯⋯難怪一眾網民都對佢負評轉正！

林婷喺第二季挑機出名超猛嘅馬來西亞雲頂酒店，冷靜勇敢嘅表現令網民激讚！其實嗰度早已發生唔少命案而幾乎半荒廢，林婷竟然要入住命案的樓層，又巡埋樓，最後仲要去到勁陰森嘅停車場查探！真係勇猛到小編都好佩服！

停車場黑媽媽，伸手不見五指⋯⋯林婷直言覺得好唔舒服，但就冇再好似第一季咁縮沙，竟然仲夠膽推門一探空置嘅房間，真係俾著其他人都未必做到！

林婷更去夜闖有成50年歷史嘅「雙溪巴里組屋」，該處係出名嘅自殺勝地，欠缺基本樓宇設備。林婷需要逐層樓行上去，但喺樓梯轉角嘅牆身就見到相傳有辟邪功效嘅黑狗血⋯⋯連同行嘅師傅都警告佢唔好再繼續探險啦！

師傅都話該處有唔少惡靈，林婷探險嗰陣都有見到疑似狗隻骸骨，不適頭痛之餘仲聽到怪聲，仲問同行嘅攝製組聽唔聽到，令觀眾毛骨悚然！

林婷仲試過同鬼玩捉迷藏，玩到啲器材冇啦啦自己熄咗咁刺激，小編真係唔敢一個人玩啊大佬⋯⋯玩到咁盡，網民都話佢又大膽又正，仲話佢真係變咗個人咁，唔好玩到咁癲啦明㗎啦！

林婷自己就表示今季好開心，監製有俾好多意見佢，又睇多咗靈探嘅節目。

有網民就話佢係俾人鬧完，第二季先扮哂大膽淡定，冷靜到好似靈探當行博物館啊！

雖然林婷第一季表現麻麻，但監製就話覺得應該比多次機會，一個咁斯文嘅女仔驚都係人之常情，不過就有為佢做多咗心理建設，希望佢可以建立信心，亦直言滿意林婷今季嘅表現，講過嘅問題都有逐一改善。

有片有真相，就嚟睇下佢呢兩季嘅分別啦！

睇嚟今次林婷都成功洗哂底啦！做廣告模特兒模特兒出身嘅林婷，喺2015年做咗第四代邦民女而開始被人留意，不過平時低調，唔算多接受訪問，所以外間都唔係話好了解呢位靚女。喺2017年，佢就第一次主持節目《入住請敲門》。

樣靚聲甜嘅佢，日常嘅照片都係行文青女神嘅斯文路線，做《入住請敲門》嘅主持人都可以話係一大嘗試！

近年工作量開始增多，都係主要拍下廣告，做下KOL、模特兒咁。

靚得嚟又Fit，Fit得嚟仲要有氣質，工作又大有進步，希望佢表現會愈嚟愈好啦！

關鍵詞