保護色拍夜戲古天樂鬧市冇人識

古天樂怕熱到暈低

在新戲演大賊的古天樂，戲中有不少動作場面，古仔開拍時已經表示:「我唔怕拍動作戲，但大熱天時拍外景，最驚會熱到暈低!」

日前，古天樂拍足全日外景，由上環荷李活道拍到去旺角鬧市，三十幾度高溫，古仔仲要著住長袖厚褸，真係睇見都熱，難怪每拍完一個鏡頭，古仔已急急返上車涼冷氣慎防中暑!

晚上約八時許大隊轉場到旺角街頭取景，古仔喺逼滿人的鬧市，由街頭行去街尾來回拍攝都竟然冇途人認到佢，keep 住曬黑皮膚多年的他，晚上如同上咗保護色一樣，但原來近日忙於拍戲少咗時間曬燈的他，亦有諗過想變白啲。

據知情者透露:「古仔以前皮膚好白，咁多年嚟都keep住曬燈曬黑啲皮膚，但呢排佢因為太忙，少咗時間曬燈，皮膚冇以前咁黑，好多人都讚好睇，令佢忽然有衝動，想自己白番啲。」

拍攝大陣仗

低調投資

13年投資開設電影公司「天下一」，近年又開埋經理人及製作公司，仲做埋演藝人協會會長，最近又出錢贊助香港藝術中心的電影院，並命名為「古天樂電影院」，會播映一系列港產片。古天樂已經唔再局限自己做演員，更積極培育電影幕前幕後人才，扶助香港電影業。

連拍三場口

據知情者透露:「雖然不停入股同收購電影後期製作公司，但古仔份人好低調，佢唔會多講，好似『天下一』旗艦電影公司，都係用媽媽名登記，開嘅經理人同宣傳公司，就交畀好友兼經理人 R o n n i e 負責 !」不過點低調都好，古天樂對電影熱誠大家有目共睹。

古天樂出錢出力低調行善

今年首嚐影帝滋味的古天樂因2008年目睹汶川地震摧毀咗好多人嘅家園，決定成立「古天樂慈善基金」，私下都經常跟進同了解興建學校慨進度，確保唔會出現豆腐渣工程。曾有記者致電詢問「在大陸捐建60幾間學校花咗幾多錢？」古天樂唔肯透露：「我只係本著做善事嘅心，唔想講錢，亦冇目標要捐建幾多學校。」仲話自己有小小成就，有能力就幫忙，亦會一直做落去。據知古天樂至今已斥資興建99間小學，並捐贈18間醫療室、750口水窖同1座小水利工程，捐款超過2,425萬。

｜斥資興建近百間小學

｜曾幫「大佬B」還巨債

除咗低調做善事，古天樂喺圈中仲幫助過唔少人度過難關，「大佬B」吳志雄曾經公開感謝古天樂喺佢最困難時支持佢，據知大佬B喺99年投資失利，蝕咗近億元，古天樂因為喺未紅時曾受過「大佬B」恩惠，所以幫佢還清巨債。此外，仲有指古天樂為感謝《陰陽路》監製南燕多年前嘅賞識，當對方患病時，一直喺經濟上支持對方，仲會久不久包機票、酒店請南燕一家去旅行。

關鍵詞

古天樂宣萱

保護色拍夜戲 古天樂鬧市冇人識