【港姐2018】14號何泳芍大熱倒灶三甲不入發文自白落選後感

大熱倒灶何泳芍五強止步

《2018香港小姐競選》最終由17號陳曉華奪冠，20號鄧卓殷係亞軍兼奪最上鏡小姐，而季軍則是7號丁子田；賽前大熱14號何泳芍（Honey）和15號陳苑澄，最後就只入圍5強。其中Honey未能入三甲有點跌眼鏡，連佢自己都話有少少失望！而今次港姐決賽嘅監製何小慧，喺賽後就表示唔會公開三甲票數喎！

其實23歲嘅潛水教練何泳芍 (Honey) 當晚都算發揮到水準，表現都好淡定，難怪好多網民都戥佢唔抵！

何泳芍雖然唔算高，但勝在笑容甜美、身材均稱，上圍更加係驕人！著上白色晚裝，好身材表露無遺，十分吸睛！

身形勻稱的Honey，擁有一身古銅色肌膚，任潛水教練的她被問到如何說服鄭裕玲和汪明荃一齊學潛水，Honey話Do姐身形弗爆，著泳衣絕無問題！

在才藝表演環節，Honey一路唱歌一路玩杯子舞！

不過Honey都直言自己嘅才藝要喺水底先表現到，如果俾個水缸佢可能就會有唔同喇！

雖然賽後Honey就直言有啲失望，但佢今日睇嚟都已經收拾咗心情，仲大方發文同大家分享賽後嘅心情添！

「So I close my eyes to the old end and open my heart to the new beginning.」（因此我閉眼不看已成過去的事，打開心靈去面對新的開始。）

「有好多支持我嘅人都有表達對我嘅關心同不值，不過我知道大家仍然會繼續鍾意我已經係對我最大嘅安慰。」

「由一開始參選只係想入final（決賽），到最後想搏盡佢希望有好成績，一切都源自運動員好勝嘅職業病。到依家一切都結束以後先發現，原來自己為咗成為大家心目中嘅香港小姐，無做到真正嘅自己。依家擺脫咗呢個框框，我會釋放自我，等大家可以見到真正嘅何泳芍。」

「雖然比賽結束咗，但係我想改變社會嘅心唔會變。我會更加努力俾大家睇到我呢個健康女仔活得有幾咁精彩。」

何泳芍並唔覺得自己嘅健康膚色係影響賽果嘅原因，喺決賽前佢亦曾經喺Instagram度同大家分享過參選嘅心路歷程，更希望今次參選會改變到一啲人對黑皮膚嘅想法。

「呢一次參選，係我鼓起好大勇氣而作出嘅決定。因為我知道如果我參選，將會面對很大的挑戰和承受很多關於我膚色的言論。從小就曬黑嘅我，由自卑和討厭自己，慢慢變得懂得欣賞自己，變得相信自己是獨特的。」

「而我希望今次參選第一可以改變到一些人對黑皮膚嘅想法，第二係希望有年紀輕嘅女孩睇到我之後，唔會再驚因爲曬黑咗而俾人笑，覺得自己好似做錯咗野咁。」

「黑不是罪，我希望所有女孩都記住，唔好因為別人對你的評價而放棄你鍾意做嘅野，自信和快樂的你才是最美的你。」

其實今次Honey參選已經達成咗佢講嘅目的，相信大家都只會戥佢唔抵，希望佢未來會有更好嘅發展！佢就話希望可以繼續潛水，同時嘗試喺娛樂圈發展。

Honey人如其名，擁有一身蜜糖健康膚色、笑容甜美，感覺好陽光好有活力，初選時已經謀殺大量菲林，亦一直係今季大熱之一！

何泳芍（Honey）心在TVB，連拍拖都只係同TVB拍，真係識講嘢！就算三甲不入都一定大把世界啦！

何泳芍喺Big Big Channel嘅才藝表演片段中，表演「扮鬼臉」，又鬥雞眼又嘟嘴咁，靚女做咩都可愛㗎啦！

Honey本身係一名潛水教練，難怪一身健康膚色，身形亦係弗到漏，其社交網站中見到唔少索爆泳衣照！

關鍵詞