簡淑兒起底 富貴住豪宅 強調出入搭巴士

撰文：東方新地

簡淑兒 新一代宅男女神

出身自組合「少女標本」的簡淑兒，自從喺《愛‧回家之八時入席》中飾演秘書Elsa後備受關注，招牌腰果眼、甜美笑容加上密密短裙露長腿成為觀眾討論焦點。

《波士早晨》係處女劇

接住《平安谷》出街的新劇《波士早晨》中，簡淑兒飾演成日撞板甩碌嘅年輕OL Hana，其實套劇早係三年前拍下，仲係簡淑兒拍嘅第一套劇！

《波士早晨》又見到佢

《波士早晨》男主角方面有黃智賢、洪永城等，吸引力一般；反而女演員陣容更吸引！除了人見人愛的Ali李佳芯、好耐無拍無綫劇的陳慧珊外，觀眾在同一時間又見到簡淑兒！今次簡淑兒飾演一個初級秘書仔，怕怕醜又驚青咁，由佢演繹就適合不過！

而喺剛播完嘅《平安谷之詭谷傳說》，簡淑兒飾演鄭子誠個女淼淼！

而佢喺《迷》入面飾演田蕊妮女兒Chloe，角色設定係一個中學生，雖然佢真人同阿田只係相差13歲，但完全冇違和感！

妝頭出事？

但回到2012年簡淑兒選港姐時，實在只可以用一個四字詞：「其貌不揚」，細眼、扁鼻兼顴骨又大，難怪頭圈已經被淘汰。事隔6年面目全非，愈大愈靚，簡淑兒就曾經解釋係當初官方妝頭出事喎！

原來係富家女

由美國回流返港的簡淑兒，入行以來都甚少談及自己的家庭背景，只知道佢有6兄弟姊妹，但原來佢家境相當不俗！簡淑兒父母經營珠寶生意，在上水及將軍澳都有專門店。另外喺紅磡一幢工業大廈亦購入兩個單位作寫字樓，生意規模唔算細。簡淑兒亦曾經幫屋企生意做生招牌，擔任代言人兼模特兒，甚至贊助過TVB及亞視藝人鑽石首飾出席活動。

簡淑兒 強調自己純天然

簡淑兒之前出席活動，被問到疑似變樣的傳聞，佢就話用人生最核突的舊照同現時相比，分別當然大，所以點講都冇用。之後佢強調自己係純天然，自己選美後就去拍劇，如果有整大家都會留意到。但問題係，依家真係好多人留意你唔同咗樣喎……

提到近日被爆係有錢女，佢就話屋企只係做一啲小生意，自己出入唔會有司機接送，平時返電視城或者出席活動都係搭巴士。另外又稱自己雖然同家姐住，但就唔係住凱旋門，絕對唔係有錢女。