新紮師兄｜回顧59歲劉青雲初出道陳年相港產野獸感男星！

Sep 8 2023

無綫安排《新紮師兄》深夜重播，除了梁朝偉外，憑劇集跑出的還有「Fit佬」劉青雲！劉青雲早年在1981年畢業於模範英文中學（與張兆輝為同班同學，同屆同學還有葉童與邱萬城），畢業後曾任職郵差，當時連續有兩名女士詢問他：「你長這麼高，為何不去當演員？」同事亦說道：「周潤發也曾在這裏工作過」，因此劉青雲抱着姑且一試的心態報名訓練班。1982年，劉青雲加入香港無綫電視第12期無綫電視藝員訓練班，著名的同期同學有劉嘉玲、吳君如、藍潔瑛等。

回顧55歲劉青雲初出道陳年相

｜83年希臘裝媾女

劉青雲83年無綫藝員訓練班畢業後被派影官方刊物賀年相，一身古希臘裝束同佢啲濃密腳毛一樣咁搶眼，跪地向年度港姐季軍李月芙獻花求愛，但反被佢用嚟扑頭，於是出動利是希望打動對方。

｜84年演Fit佬成名

劉青雲喺84年劇集《新紮師兄》演梁朝偉警察學堂同學倪峰，因身形魁梧兼體能過人而有 Fit 佬稱號，但因捉賊受傷跛腳離開警隊，劉嘉玲同佢結婚時都估唔到佢已變成亡命殺手，青雲憑冷傲 Fit 佬一角走紅入屋。

｜86年淡定又斯文

劉青雲眉粗皮膚黝黑型格豪邁，86 年未滿22歲嘅佢，呢個翹腳坐姿展現佢斯文淡定嘅一面。

｜87年古裝look怪樣

劉青雲喺呢套古裝武俠劇《天龍神劍》演桃源堡堡主徒弟青龍，但佢計劃弒師奪堡主之位，青雲黐古裝頭套 look 怪模怪樣，佢同周潤發一樣係宜今不宜古甚少演古裝劇。

｜88年《太平天國》西王

88年劇集《太平天國》劉青雲演太平天國「開國六王」之一西王蕭朝貴，呢個未封王前嘅清裝平民 look，將條辮繑上頭加埋呢個坐姿，盡顯呢位太平軍驍勇將領嘅威風豪邁。

｜88年藍潔瑛合照

劉青雲同藍潔瑛係無綫第十二期藝員訓練班同學，但畢業後只喺《畫出彩虹》合作過，88年戴咗副小雲式粗框眼鏡嘅青雲同藍潔瑛碰面即時合照留念，但有美女與野獸感覺。

｜90年同星爺鬥氣

周星馳最後一部電視劇《孖仔孖心肝》首次同劉青雲合作演失散兄弟，劇中首次碰面就留低極差印象，後來竟然同住一屋，唔知係兄弟嘅兩人仲同陳秀雯大玩三角戀，宣傳相中佢兩個互毆就知係對歡喜冤家。

｜91年海潮首合作

91年溫碧霞首次為無綫拍劇《與郎共舞》演夜總會知客，同古板木獨嘅建築師兼鄰居劉青雲由鬥氣冤家慢慢變成情侶，但後嚟戀情面臨抉擇，同年兩人齊齊上官方刊物封面。

｜92年劇集代表作

劉青雲電視劇代表作絕對係92 年神劇《大時代》方展博一角，劇中同繼母藍潔瑛三個妹妹相依為命，具炒股天份嘅佢定下復仇大計，同鄭少秋演的殺父仇人丁蟹喺股壇上決生死，而佢同周慧敏演嘅嘅慳妹嘅戀情亦叫人難忘。

｜94年粗獷時裝模

94年劉青雲同新晉玉女楊采妮獲某時裝品牌邀請任 model 拍平面廣告，宣傳刊物兩人各佔一半，相中青雲鬚根 look 著上各式靚衫，粗獷man爆。

｜94年一劇定情

喺神劇《大時代》同劉青雲、周慧敏有段三角戀嘅郭藹明，現實中周慧敏知道青雲鍾意郭藹明就充當紅娘，邀請佢兩個一齊去睇自己嘅紅館演唱會，兩人拍拖四年後拉埋天窗，係圈中著名模範夫婦。

劉青雲郭藹明恩愛24年

結婚20年，劉青雲和郭藹明這對今年步入「瓷婚」的圈中模範夫妻，至今行街仍會甜蜜拖手，恩愛羨煞旁人，能夠令婚姻保鮮，劉青雲坦言全靠老婆郭藹明功勞，他大讚老婆說：「太太係我人生最好嘅禮物，佢好聰明，我鍾意咩、唔鍾意咩，唔使講佢都一清二楚！」

人生最大膽一次

事實上，當年鼓起勇氣追求現任劉太，劉青雲曾表示這是他人生最大膽一次。據知情者透露：「青雲同Amy 拍《大時代》嗰時仲未拍拖，佢兩個喺埋一齊都係多得周慧敏撮合，94年Vivian開演唱會，因為知道青雲對Amy有意思，就邀請佢兩個一齊去睇演唱會，幫青雲製造機會，不過之後青雲再約會Amy，都要鼓起好大勇氣，始終當時Amy有學識又靚，而青雲事業先啱啱起步，冇車冇樓，第一次約 Amy去街，青雲仲硬住頭皮叫Amy揸車去接佢，然後一齊食飯，所以到依家佢都成日提起，好感激老婆當時冇嫌棄佢！」

復出要問准老公

眾所周知，郭藹明是美國南加州大學機械工程學雙碩士，當年Amy為青雲放棄工程師工作。想不到人妻婚後至今，仍然為陪老公放棄復出；三年前《大時代》翻播，一眾演員被炒熱，當時就有唔少人邀請Amy復出。Amy友人透露：「嗰時同無綫都出嚟傾咗幾次，不過除咗睇角色， Amy最著重係時間，講明一定要就咗老公檔期先，最後都因為怕困身陪唔到老公，所以傾唔成！」事事老公行先又識得撒嬌，相信就是郭藹明維繫甜蜜婚姻最佳秘技！

激罕當街摟錫

劉氏夫婦出名恩愛，兩人曾被本刊捕獲拍拖到九龍灣MegaBox睇戲，散場離開搭扶手電梯時，郭藹明激罕公開施冧功，兩手從頸環抱老公撒嬌摟錫，甜蜜儼如新婚，睇青雲望住老婆嘅眼神，就知佢完全被老婆降伏！

劉青雲一齊24年，拍拖行街睇戲好平常，但唔平常嘅係，本來已經係老夫老妻，竟然睇落似足初戀男女咁恩愛，劉太對住老公，非常小鳥依人，身體語言已經表達晒，真係唔使講咁多！ — 一齊24年，拍拖行街睇戲好平常，但唔平常嘅係，本來已經係老夫老妻，竟然睇落似足初戀男女咁恩愛，劉太對住老公，非常小鳥依人，身體語言已經表達晒，真係唔使講咁多！

拍拖行超市

兩公婆由司機接載返回西貢，先到市中心超市上糧，入到超市，郭藹明極速去攞手推車掃貨，青雲就跟在後面，唔會乜都等老公服侍，Amy這個超級好老婆真係邊度搵！超市上完糧，兩人坐車返回西貢西沙小築寓所，已經是傍晚六時多，相信Amy又會親自下廚炮製美食，同老公留家撐枱腳。

拒翹埋手等服侍

郭藹明這位碩士港姐老婆，除咗高學歷有內涵，更加是個賢內助，溫柔又善解人意，賢淑能幹兼備。據Amy好友透露：「Amy份人好溫柔隨和，同老公結婚咁多年﹐相處仲係相敬如賓，同老公講嘢仲會講唔該、麻煩晒，青雲受老婆感染，都會同太太講多謝、唔該，相處會互相尊重，而且Amy對住老公仲好識撒嬌，保持住拍拖嗰份新鮮感！做咗少奶奶咁多年，老公又搵到，但Amy都唔會翹埋手等人服侍，佢知老公喺出面工作辛苦，唔想青雲仲要為屋企事費心，自己會將屋企啲嘢搞得妥妥當當，執屋煮飯完全唔使老公操勞，好似屋企要換燈膽，或者簡單嘅髹牆，Amy都會自己落手搞掂，雖然有啲事可以用錢請人做，不過Amy唔想亂花老公啲辛苦錢，會應使得使，平日生活都好平民化！」

兩年幾打造4千萬堡壘

持家有道的Amy，一直手握青雲財政大權，十多年來負責幫老公投資，先後買賣超過十個物業，除咗買樓，亦有買舖及商廈，幾乎每次都賺錢離場，成功幫老公滾大副身家。劉氏夫婦鍾情西貢區，之前租住西貢龍嶺獨立屋多年，14年底以3,280萬買入現居的西貢西沙小築獨立屋，現市值近4千萬，由於該屋苑樓齡已經三十多年，青雲夫婦要將新居全面翻新，裝修工程搞足兩年幾先完成；雖然間屋面對無敵西貢海，但二人卻放棄裝落地玻璃，更封閉唔少窗位，貫徹其低調作風。

據知情者透露：「佢兩個都鍾意住郊區，特別鍾情西貢區，不過西沙小築好少有放盤，嗰次佢兩公婆一齊去睇樓，Amy 一睇已經好鍾意嗰度嘅無敵海景，就即刻扑槌買，但因為嗰度樓齡已經有三十幾年，間屋要大翻新，Amy仲搵咗設計師同風水師幫手，喺高人教路下，刻意喺大廳唔裝落地玻璃，裝修搞咗兩年幾先完成！」

劉青雲新居有無敵海景，落沙灘只需十分鐘，兩公婆隨時想行沙灘浪漫吓都好容易，而平日鍾意跑步做瑜伽的Amy，對住個海做運動，相信亦特別心曠神怡。 — 新居有無敵海景，落沙灘只需十分鐘，兩公婆隨時想行沙灘浪漫吓都好容易，而平日鍾意跑步做瑜伽的Amy，對住個海做運動，相信亦特別心曠神怡。

為打造安樂窩單拖去旺角揀建材

影帝背後女人一啲都唔簡單，知道老公在外拍戲相當忙，郭藹明就一個人為西沙小築新居搞裝修，兩年多來，經常一個人落上海街，親自買裝修物料，過去曾被本刊拍得打扮樸素去睇裝修材料，當日Amy無論揀地磚、櫥櫃、浴室材料甚至門柄都非常細心，再落手落腳度尺，完全係完美妻子典範。

劉青雲五大冧妻語錄

平時不苟言笑的青雲，15年憑《竊聽風雲3》奪金像影帝，公開發表「太空船論」多謝老婆，少有公開講「愛的宣言」的他，唔止台下老婆被感動到眼濕濕，仲冧盡全港雌性動物。

最經典：冧上太空

2015年劉青雲憑《竊聽風雲3》贏得第34屆香港電影金像獎頒獎禮「最佳男主角」，這是他第二次擠身金像獎影帝寶座。劉青雲在台上強忍淚水，感謝太太郭藹明，他說：「我要多謝我太太，每次當我揸住隻太空船，飛到去宇宙唔知邊一度嘅時候，你總係有辦法，令我好安全咁返嚟地球，多謝！」郭藹明聽到劉青雲的話，感動得用手指抹眼淚。