30歲張曦雯識冧人盡得高層歡心 身材完美、貼地機迷儲fans無難度
撰文：東方新地、圖片：東方新地/張曦雯IG
張曦雯識冧人盡得高層歡心
一向都識做，對住男同事已經好友善，估唔到呢個笑容原來仲可以再昇華至更高層次！話說同時收工走人嘅仲有戲劇部一姐曾勵珍，一見珍姐，張曦雯用更燦爛嘅笑容主動向珍姐指點方向，珍姐不知幾受落，抵佢盡得高層監製歡心啫！舊年已經攞咗飛躍進步大獎，今年唔知又攞咩獎呢？
與圈外男友拍拖4年邊打機邊放閃
事業得意，連愛情生活都一樣美滿！據知張曦雯已同圈外男友Brunyez 拍拖四年，感情穩定。近日男友更貼心送上 VR game 畀呢個機迷女友作為生日禮物，氹到張曦雯鬼咁開心，佢仲將自己玩game 片段上載到 IG 分享，著上灰色貼身上衣有腰又有胸，大晒身材之餘，負責拍片嘅男友驚佢撞親全程傍住佢玩，乘機放閃！
被大台力捧極速上位！張曦雯神秘身世大公開
張曦雯（Kelly）近年在無綫一下子攀升做咗女主角，試過飾演個性「麻甩」的車房妹，在新一輯《飛虎之雷霆極戰》又會做英國特工。高速上位做女神，但網上就傳佢嘅身世好神秘……
現年30歲嘅無綫張曦雯（Kelly），2012年獲選國際中華小姐冠軍。佢除咗樣靚氣質好，年前仲喺社交網直播打機，打破咗自己高不可攀嘅形象，被宅男捧為「打機女神」。
原來家庭背景僅只「一般般」
有本地媒體就爆料，外表似十足「ABC」嘅Kelly家庭背景僅只「一般般」，也一樣反差大。有消息人士指，Kelly喺小學四年班先移民美國，而張曦雯嘅父母都係草根，移民前居住喺黃大仙下邨公屋。張父任職技工，張母幫人做facial，仲同親友合資經營美容舖，收入一般。
識收兵
靚就靚喇，不過一直被網民認為靚得太離地、太有距離感喎！去年開始，張曦雯開始上網直播打機，既公開自己貼地宅女一面、亦都吸引唔少機民，即時粉絲暴漲！
大牌冧
家底不俗、受過高等教育、氣質非凡仲有中英文流利，所以張曦雯亦受大型品牌喜愛，為國際大品牌拍過廣告、亦受邀做名車發布會司儀。
年開四劇
張曦雯只在兩套劇做過大茄，直至今年機會殺到，連演四套重頭劇，仲套套戲份重、角色討好。
張曦雯直播打機喪爆粗 網民激讚真性情
2012年華姐冠軍 張曦雯 (Kelly) 樣子標緻、身材火辣，早在主持明珠台《Pearl Tonight》時已備受關注，而且早前在劇集《律政強人》中的演出非常亮眼，成為唔少男士們心中的女神！Kelly雖然個人背景及美貌都被指「離地」得過份，不過原來佢私底下好鍾意打機，早前更在twitch開戶直播自己玩大熱遊戲《Resident Evil 7》，表情多多非常可愛，玩到興起時更情不自禁狂爆粗！
貴為華姐冠軍的Kelly樣子標緻、笑容甜美，不單上圍豐滿，身高175cm的她更擁有一雙修長美腿，着起晚裝時貴氣仙氣兼備，着起泳衣更睇到大家鼻血狂流！
《律政強人》突圍
Kelly早前在大台劇《律政強人》中與前輩方中信、廖啟智及李佳芯等人合作，不過首次拍劇的她毫不輸蝕，將其他女角比下去！Kelly在劇中不時晒長腿之餘，演出自然又不造作，更有着一種獨特的高貴氣質，在眾女角中算是演律師最入型入格！
直播打機爆粗
有着華姐冠軍的美貌與氣質、外國回流英文一流，Kelly雖然個人背景及美貌都被指「離地」，但原來都有非常麻甩的一面！Kelly上月29日開設twitch戶口，直播自己玩大熱喪屍遊戲《Resident Evil 7》，高峰期有逾二千人收看！
大家唔好以為女神打機只係「做樣」，唔少網民都讚佢玩得有板有眼，技術到家，最重要係流露真性情！見到索顏戴眼鏡的Kelly打機時非常肉緊，表情多多，時而大笑時而扁嘴，玩得興起時仲狂爆英文粗口！佢玩得high之餘，網民睇得更high，小編都好想瘋狂同Kelly打機呀！
連打9個鐘
有人以為係有公司贊助Kelly直播打機，不過其實遊戲機同隻Game都係佢自掏腰包買，仲會經常同弟弟一齊玩！至於呢隻《Resident Evil 7》，Kelly未做twitch前已經玩得非常沉迷，試過連續打9個鐘頭，飯都唔食！Kelly又稱大家在電視見到的自己未算是真正的自己，所以希望展現自己最真的一面，仲話打機爆粗好正常啫！
