37歲李佳芯同男友成落難鴛鴦 演藝夢碎轉行求生
撰文、圖片：東方新地
傳李佳芯「唔聽話」被TVB雪藏
李佳芯（Ali）早前被指網上言論表露政治取態，被TVB雪藏，觀眾緣和人氣急挫，近幾個月幾乎絕跡無綫熒光幕。據知情者透露：「Ali向來好有性格，就因為太硬頸反而累事，最初加入無綫，佢都仲算聽話，但自從紅咗之後，佢以為自己有Say，可以揀工作，好似嗰次推劇咁，佢冇顧全大局點都唔肯讓步。講真，一間公司冇話冇咗邊個會唔掂，無綫近年亦有唔少有潛質花旦彈起，好似朱晨麗、張曦雯、高Ling（高海寧）、靚湯（湯洛雯）咁，無綫梗係寧願捧啲聽教聽話嘅啦！」曾經被捧上天，更促使李佳芯自信爆棚，即使去年底傳出《 BB大晒》會換上岑麗香擔正，當時在趕拍劇集《愛美麗狂想曲》的她仍樂觀表示：「其實拍完一套30集（《愛美麗狂想曲》）嘅劇，又要拍一套25集（《 BB大晒》），我自己都覺得負荷唔到， TVB有太多劇，需要嘅演員實在太多，唔會冇得做！」
演藝夢碎轉行寫書求生
不過當工作急煞停，連月來坐冷板凳的她亦開始洞悉事業危機。事業冇彎轉，近日留家抗疫的Ali，就不時透過個人IG留言抒發情緒，日前更寫道：「再不如意，也好好用心過」以及「不需要回到過去，只望能回復簡單的日常」，看來事業由高峰滑落，對她來說的確是一大考驗。據悉同無綫仍有四年合約的她，一旦不獲解凍隨時演藝夢碎，早前她就透露計劃在今年推出散文集，據知今次自資出書，她根本不在意銷路，反而希望透過作品令人關注她另一面才華，鋪路轉行在幕後創作方面發展。據知情人士說：「攞咗視后之後，Ali人氣急升，好多客都鍾意用佢，收入飆升，佢同Danny（陳炳銓）嗰排都密密睇樓，因為想買間大啲嘅屋，可以接埋父母一齊住，Ali上年已經計過數，諗定今年達成買樓願望，不過，事業突然插水，加上呢排新冠肺炎疫情，佢同男友兩個差唔多冇晒嘢做，咪話買樓，連日常使費都要慳住用！話晒要養幾頭家，又唔知幾時事業重見天日，佢唔想坐以待斃，希望出書鋪路轉行，希望有人欣賞佢嘅創作，多個機會！」
ViuTv捧靚仔陳炳銓冇得留低
好運突然消失，就連跟她拍拖六年的男友陳炳銓同樣運滯，16年由NowTV過檔ViuTV做藝人的他，近日亦不獲ViuTV續約，而原本除了做藝人亦做戲劇導師的陳炳銓，在新蒲崗工廈開班的學校，亦受疫情影響，唔夠學生開唔到班，呢幾個月被迫要納空租。據Danny好友說：「唔知係咪得女友人氣帶旺，Danny喺Viu曾經被力捧過，有劇拍又有得做監製，不過，由佢做製作嘅Viu選秀節目《廣告女皇》，出嚟嘅反應一般，完全比唔上《全民造星》，加上近日Viu經理人部門大換血，現時在經理人揸大旗嘅花姐，講明要捧靚仔、後生仔，今年約滿嘅Danny，無得留低。」
落難鴛鴦食平嘢醫肚
連月來同男友都「被休息」的Ali，日前就同男友拍拖到西貢村食茶餐撐枱腳，平平哋一餐醫肚後，兩個再在附近放狗，昔日行運時，即使唔化妝都容光煥發的她，這日頭戴鴨舌帽，雖然戴上眼鏡和口罩，做足肺炎防疫措施，但包到冚仍難掩一臉倦容，全程沒精打采，身旁的男友陳炳銓更加冇厘神氣，以前極之親民的兩人，發現記者亦好唔自在，極速彈開，然後火速上車走人。
