美容行業踏過界 想做微晶磨皮記得搵醫生

撰文：Ruby｜圖片：網上圖片、Instagram

香港有唔少美容學校，佢哋學嘅知識同課程標旁住，若學成畢業，就代表有外國受認可嘅專業資格，被視為專業人士。但其實到得到真正嘅專業資格，係必需要通過考試認證先得，例如比較出名嘅ITEC、City & Guilds。

但香港政府一直冇派發認可嘅專業資格認證書，令顧客好多時都唔知道幫你做療程嘅美容師，究竟學過幾多知識，而亦唔係每位美容師都擁有國際性認可資格，好多時都只係讀過美容院自己編配嘅培訓課程，導致市面上充斥好多參差不齊嘅美容師。

現時嘅美容院都會提供一啲涉及醫學美容機器同治療嘅課程，所以近年美容行業經常踩過界嘅情況。就算美容師得到國際認可嘅專業資格，其實有部分涉及風險醫美療程／程序，都應該由註冊執業醫生去處理。
有咩療程適合由醫生處理？
根據政府成立嘅「私營醫療機構規管檢討督導委員會」，當中屬下「區分醫療程序和美容服務工作小組」係2013年提交報告就指出，涉及多項皮膚處理屬於「醫療程序」應該由註冊醫生處理，例如：美白針、減肥針、肉毒桿菌、氣壓槍、高壓氧氣治療、微晶磨皮、化學剝脫、水磨嫩膚、水鑽嫩膚加真空療程等…

另外漂牙程序就應該由註冊牙醫處理，否則就有機會觸犯《醫生註冊條例》或《牙醫註冊條例》另外一點必須留意，雖然由醫生處理，但都要留意醫生所屬專科類型，所以記得如果想做以上療程時，一定要去有信譽嘅醫美診所查詢療程啦！

都係果句，以上內容只作參考，做任何療程都要搵專業可靠，甚至有認證執照的治療師或醫生問清楚喔。另外，進行美容注射時，都要了解多d安全及風險呀。